Tayson tənqid etdi: Buna görə onları heç kim tanımır

Əfsanəvi boksçu Mayk Tayson müasir boks və indiki döyüşçülərin vəziyyəti barədə açıqlama verib.

Aut.az xəbər verir ki, o, bu barədə “The Ariel Helwani Show” proqramına danışıb.

Sabiq dünya çempionu bildirib ki, hazırkı döyüşçülər azarkeşlər üçün kifayət qədər maraqlı deyil, onların tənbəl olduğunu və bu sahədə dəyişikliklərə ehtiyac olduğunu vurğulayıb:

“Bilirsiniz, döyüşçülər indi nədən düşünməlidirlər? 60 yaşlı bu kişinin hələ rekordlar qırmasına baxmaqdan. Onlar özlərindən məyus olmalı idilər. Bu yaşlı pişik bunu necə bacarır? Bilirsiniz niyə? Çünki onlar tənbəldirlər. Onlar il ərzində bir-iki döyüşdən çox keçirmirlər. Ona görə də onları heç kim tanımır. Onlara hekayə lazımdır.

Onlar azarkeşləri maraqlandıracaq şəkildə çıxış etməlidirlər. İnsanlar onların karyerasını izləməlidir. Onlar yaxşı pul qazanırlar. Amma əgər bir ildə üç döyüş etsələr, daha çox pul qazanacaqlar. Daim çıxış edirsən, formada qalmaq asanlaşır və daha çox pul qazanırsan. Hər zamankindən daha çox”.

Qeyd edək ki, Mayk Tayson 2024-cü ilin noyabrında karyerasını bərpa edib və həmin vaxt şoumen Ceyk Pol ilə döyüşdə hakimlərin yekdil qərarı ilə məğlub olub.

Tezliklə “Dəmir Mayk” yenidən rinqə çıxacaq. O, Flayd Meyvezer ilə nümayiş döyüşü keçirəcək. Əvvəlcə döyüş 25 aprel üçün nəzərdə tutulsa da, son məlumatlara görə, qarşılaşma daha sonrakı vaxta təxirə salına bilər.