Usik tarixi qərarı həftə sonunda açıqlayacaq

Ukraynalı boksçu və ağır çəkidə dünya çempionu Aleksandr Usik bu həftənin sonuna qədər boksdan ayrılacağını açıqlaya bilər.

Aut.az xəbər verir ki, bu barədə Usikin nümayəndəsi Sergey Lapin bildirib.

“Qərar bu həftənin sonuna qədər veriləcək və hər kəs vəziyyətin necə olduğunu biləcək. Aydınlıq tezliklə gələcək.

Amma insanlar bir şeyi yadda saxlamalıdırlar: boksçu Aleksandrın nail olduğuna nail olduqda, rinqdəki hər bir çıxış xüsusi olur. Bəlkə də azarkeşlər artıq onun rinqdəki sonuncu çıxışını görüblər. Yaxud bəlkə də qarşıda başqa bir fəsil var”, – deyə “The Mirror” qəzeti Lapinin sözlərini sitat gətirib.

Otuz doqquz yaşlı Usik peşəkar boksda 25 döyüş keçirib və 25 qələbə qazanıb. May ayında ukraynalı boksçu Misirin Giza şəhərində keçirilən titul döyüşündə niderlandlı Riko Verhoeveni nokaut edib.

Aut.az