“Çelsi” bu futbolçusundan külli miqdarda pul qopara bilər: Məhkəməyə müraciət olacaq?

“Çelsi” ukraynalı hücumçu Mixaylo Mudriki məhkəməyə verə bilər.

Aut.az xəbər verir ki, “The Athletic”in məlumatına görə, London klubu dopinq qaydalarını pozmaqda ittiham olunan Mudriki maddi cəhətdən cəzalandıra bilər.

“Çelsi” Mudriki “Şaxtyor”dan 89 milyon avroya alıb, lakin dopinq qalmaqalına qarışdığı üçün futbolçu aktiv olaraq xeyli ucuzlaşıb. “Mavilər” əvvəllər də oxşar vəziyyətdə olub və sonda rumıniyalı hücumçu Adrian Mutudan 17,1 milyon avro qazanıb. Bununla belə, mənbənin vurğuladığı kimi, “Çelsi”nin Mudriki məhkəməyə verməsi ehtimalı azdır – klubun bu cür hərəkətləri potensial yeni gələnləri qorxuda bilər.

Mudrikin dopinqdə təqsirli bilinəcəyi təqdirdə, ukraynalı 4 ilə qədər diskvalifikasiya ilə üzləşəcək.

Aut.az