Kloppu söyən, kokain qəbul edən hakim danışdı: Çox utanıram

Ötən ay haqqında müxtəlif videolar yayıldıqdan sonra qovulan məşhur ingilis hakimi Devid Kut açıqlama verib.

“Uzun həftələr və ya aylar ərzində hər gün bundan istifadə etməmişəm. Ondan istifadə etmədiyim uzun dövrlər olub, amma bu mənim reallıqdan qaçış yollarımdan biri idi. Bir şeyə keçmək, stressdən, amansız işdən uzaqlaşmaq. Bu yolu seçdiyimi etiraf etməkdən çox, çox utanıram.

2023-cü ildə qəflətən anamı itirdim. Eyni zamanda əmimə neyron xəstəliyi diaqnozu qoyuldu. Eyni zamanda, VAR tətbiqindən sonra hər oyun üçün altı hakim tələb olunurdu. 2023/24 mövsümündə U17 Dünya Kuboku, Avro və Olimpiada da daxil olmaqla 90-dan çox oyunda işləmişəm.

Sadəcə o videoda özümü tanımıram. O zaman özümü necə hiss etdiyimi izah edə bilmirəm, amma bəli, o mən idim. İş qrafiki belə olduğundan, mənim üçün çox çətin idi, fasilə vermək imkanı yox idi. Beləliklə, mənim tutduğum yol budur”, – Kut “The Sun”a danışıb.

Qeyd edək ki, yayılan videoların birində Kut Yurgen Klopp haqqında nalayiq ifadələr işlətmiş, digərində isə Avro-2024 zamanı kokaindən istifadə edərkən görüntülənmişdi.

Aut.az