“Neftçi”nin yeni mövsümə hazırlıq planı müəyyənləşib.
Aut.az xəbər verir ki, “ağ-qaralar” təlim-məşq toplanışının birinci mərhələsini iyunun 21-dən 28-dək Bakıda keçəcək.
Təlim-məşq toplanışının ikinci mərhələsi iyunun 29-dan iyulun 19-dək Rusiyada reallaşacaq. “Neftçi” iyulun 1-dən 15-dək Sankt-Peterburq şəhərində təşkil olunacaq ənənəvi “Matç TV” turnirində iştirak edəcək. “Neftçi” turnir çərçivəsində iyulun 1-i Bakı vaxtı ilə saat 20:30-da Rusiyanın “Zenit”, 8-i saat 20:30 Serbiyanın “Srvena Zvezda”, 15-i saat 15:00-da isə Türkiyənin “Fənərbaxça” klubu ilə qarşılaşacaq. “Zenit”lə oyun “Qazprom Arena”da, digər iki görüş isə “Smena” stadionunda olacaq.
Turnir başa çatandan sonra “Neftçi” Rusiyanın paytaxtına yollanaraq Moskva “Spartak”ı ilə yoldaşlıq oyunu keçirəcək. Bu matç iyulun 18-də “Otkrıtiye Bank Arena”da baş tutacaq. Komanda iyulun 19-da Bakıya qayıdacaq və hazırlığını paytaxtda davam etdirəcək.
Qeyd edək ki, “Neftçi” yeni mövsümdə UEFA Konfrans Liqasında iştirak edəcək. Komanda qitə miqyaslı yarışa 2-ci təsnifat mərhələsindən qoşulacaq. Bu mərhələnin oyunları iyulun 27-də və avqustun 3-də keçiriləcək. Rəqibin adına isə iyunun 21-də təşkil olunacaq püşkatma mərasimində aydınlıq gələcək.
Rusiyanın Ukraynaya işğalçı hücumundan sonra bu ölkənin klubları bütün beynəlxalq yarışlardan uzaqlaşdırılıb. Hətta Rusiya klublarının yoldaşlıq görüşü təkliflərinə də “yox” cavabı verilir. Azərbaycan 30 il ərzində işğaldan əziyyət çəkib. Belə bir məqamda “Neftçi”nin rusların oyuncağına çevrilməsi, Sankt-Peterburqdan vurub Moskvadan çıxması mənəvi baxımdan bütün dəyərlərə tüpürməkdir.
Aut.az