Keçmiş Formula 1 komandası yarışlara qayıdır?

2007-ci ildə “Kral yarışı”nda iştirak etmiş keçmiş Formula 1 komandası “Spayker”, dözümlülük yarışları da daxil olmaqla, motor idmanına qayıtmağı düşünür.

Aut.az xəbər verir ki, Niderland istehsalçısının əsas məqsədlərindən biri 24 saatlıq Le Mans yarışına qayıtmaqdır.

“Hazırda mütləq bir şey baş verir. Viktor Müller dərhal dedi: “Əgər yenidən başlayırıqsa, deməli, Le Mansa da qayıdacağıq”. O, həmçinin qeyd etdi ki, avtoidmana qayıtmaq uzaq bir perspektivdir. Üç ildən sonra yenidən şəbəkəyə qayıdacağımızı deyə bilmərəm. Bu, daha uzun çəkə bilər”, – “RacingNews365” Le Mansda “Spayker” komandasında yarışmaq təcrübəsi olan niderlandlı pilot Jeroen Bleekemolendən sitat gətirib.

1999-cu ildə qurulan “Spayker”, 2006-cı il mövsümünün sonunda Formula 1-ə qatıldı və “Midland” komandasını satın aldı. 2007-ci ildə hindistanlı milyarder Vijay Mallyaya satıldı və 2008-ci ildə “Force India” olaraq yarışlara başladı. “Kral yarışı”ndan əlavə, “Spayker” sonuncu dəfə 2010-cu ildə yarışdığı 24 saatlıq Le Mans yarışı da daxil olmaqla dözümlülük yarışlarında iştirak edib.

Diqqətəlayiq haldır ki, “Spayker”in 2021-ci ildəki iflası şirkətin planlarını pozmadı: 2022-ci ildə idman avtomobillərinin istehsalına qayıdış elan edildi.

Builki “Pebble Beach Concours d’Elegance”da debüt etməsi gözlənilən “C8 Preliator” superkarının yeni şassisi və mühərriki də yarış avtomobili üçün əsas ola bilər.

Aut.az