“Siti” ilə Premyer Liqanın çəkişməsi davam edir: Hesabatlar niyə açıqlanmır?

“Mançester Siti” hələ də Premyer Liqa tərəfindən irəli sürülən 115 maliyyə ittihamının yaratdığı uzunmüddətli təsirlərlə mübarizə aparır.

Aut.az xəbər verir ki, ictimaiyyətə təqdim olunan konkret sübutlar və oxşar presedentlər olmamasına baxmayaraq 3 ildir bu iş futbol gündəminin əsas mövzularından biridir.

Klub öz günahsızlığını qoruyur və açıq şəkildə dərc olunan audit olunmuş maliyyə hesabatlarına istinad edir. Lakin hər iki tərəfin detallı məlumatları açıqlamaması müşahidəçilərin çoxunun günah ehtimalını düşünməsinə səbəb olur. Xüsusilə də “Siti”nin meydandakı dominantlığı bəzi dairələrdə uğurların kölgə altında olduğu barədə fikirləri gücləndirir.

Keçmiş klub rəhbərlərindən Kristian Purslou son podkast çıxışında diqqətdən kənarda qalan mühüm məqama toxunub. O qeyd edib ki, BYD və “Revolut” kimi iri sponsorlar klubla əməkdaşlıq etməkdən qətiyyən çəkinmirlər:

“Bu, sadəcə formal tərəfdaşlıq deyil, böyük biznes qurumlarının öz brendlərini “Mançester Siti” ilə əlaqələndirmək istədiklərini göstərən ciddi etimad göstəricisidir”.

O əlavə edib ki, rəqib klubların rəhbərləri belə müqavilələr əldə etmək üçün hər şeyi etməyə hazır olardılar. O, həmçinin qeyd edib ki, əgər klub günahkar sayılarsa, ciddi sanksiyalar, o cümlədən apellyasiya prosesləri mümkündür. Lakin onun sözlərinə görə, biznes dünyasının kluba göstərdiyi etimad ictimaiyyət arasında mümkün cəza ilə bağlı geniş yayılmış fikirlərlə ziddiyyət təşkil edir. Əgər Premyer Liqa ittihamları sübut edə bilməsə, bu, qurum üçün ciddi reputasiya zərbəsi ola bilər.

Hazırda proses hələ yekunlaşmayıb və qərarın nə vaxt veriləcəyi məlum deyil. Nəticədən asılı olmayaraq, bu işin İngiltərə futbolu üçün çox böyük nəticələri ola bilər.

Aut.az