VAR-ın niyə tətbiq olunduğunu unutmuşuq – Rozetti nəyə eyham vurur?

UEFA Hakimlər Komitəsinin sədri Roberto Rozetti hesab edir ki, VAR oyun vəziyyətlərinə həddindən artıq müdaxilə edir.

Aut.az xəbər verir ki, Seriya A-nın keçmiş hakimi hazırda Çempionlar Liqası, Avropa Liqası və Konfrans Liqasında hakimliyə nəzarət edir.

“VAR-ın müdaxiləsi ilə bağlı bunu deyə bilərəm: Düşünürəm ki, bu sistemin tətbiq olunma səbəbini unutmuşuq. Müəyyən dərəcədə onu hər yerdə unutmuşuq. Unutmayın ki, səkkiz il əvvəl Londona gəldim və VAR-ın nə demək olduğunu müzakirə etdik. Aşkar səhvlər barədə danışdıq.

Niyə aydın və aşkar səhvlərdən danışdıq? Çünki texnologiya faktlara əsaslanan qərarlar üçün yaxşı işləyir. Obyektiv qərarlar üçün əladır. Subyektiv qiymətləndirmələri şərh etmək daha çətindir. Buna görə də aydın və aşkar səhvlər və aydın dəlillər haqqında danışmağa başladıq.

Düşünürəm ki, mövsümün sonunda keçiriləcək görüşlərimizdə bunu yenidən müzakirə etməliyik. Mikroskopik VAR müdaxiləsinə doğru irəliləyə bilmərik. Biz futbolu olduğu kimi sevirik”, – Rozetti deyib.

Aut.az