BƏƏ Əfqanıstanın qadın futbolçularına viza vermədi: Görün FİFA nə etdi

Əfqanıstanın qadınlardan ibarət qaçqın komandasına BƏƏ-də keçiriləcək turnirdə iştirak etmək üçün viza verilməyib.

Aut.az xəbər verir ki, Birləşmiş Ərəb Əmirlikləri ilk “FIFA Unites” turnirində iştirak etməli olan Əfqanıstanın qadın qaçqın komandası üçün viza müraciətlərini rədd edib. Qarşılaşmaların bu cümə axşamından gələn çərşənbə gününə kimi keçirilməsi, futbolçuların isə oktyabrın 11-də Dubayda təlim-məşq toplanışı keçməsi nəzərdə tutulurdu.

Viza verilməməsinə baxmayaraq, FİFA Avstraliya, Böyük Britaniya, Portuqaliya və İtaliyadakı oyunçulara hava limanlarına getməyi və uçuşlarını gözləməyi tövsiyə edib. Lakin sonradan futbolçulara təyyarəyə buraxılmaması barədə məlumat verilib. FİFA bu müddət ərzində onlarla əlaqə saxlayıb.

Bazar ertəsi FİFA turniri Mərakeşə köçürdüyünü və Əfqanıstanın ilk oyunu bazar günü keçirəcəyini açıqladı. Qaçqın yığmanın turnirin təşkilindən narazılığına görə geri çəkildiyi bildirilir. Avstraliyada olan oyunçular ilk matçdan bir neçə gün əvvəl 30 saat yol getməli idilər.

“Biz etiraf edirik ki, FİFA-dan asılı olmayan amillər səbəbindən yaranan vəziyyətlər çətin ola bilər və bəzi oyunçular və heyət üzvləri üçün narahatlıq yarada bilər. Bu layihədə olduğu kimi, bütün oyunçuların və işçilərin rifahı FİFA-nın əsas prioriteti olub və olaraq qalır.

Komandaya təklif olunan xüsusi təhlükəsizlik və rifah xidmətləri vasitəsilə onların meydanda və meydandan kənarda tam dəstəklənməsini təmin etmək üçün oyunçular və heyətlə gündəlik işləməyə davam edirik.

Turnirin keçiriləcəyi məkanın dəyişdirilməsi iştirakçı komandaların səyahət təşkilinə təsir edən gözlənilməz son dəqiqə problemləri ilə əlaqədardır.

Turnirin təxirə salınması qərarı bütün komandaların turnirin dəyərlərinə və FİFA-nın Əfqanıstanda qadın futbolu ilə bağlı innovativ və iddialı strategiyasına uyğun təhlükəsiz, inklüziv və rəqabət mühitində iştirak edə bilməsini təmin etmək üçün qəbul edilib”, – FİFA-nın açıqlamasında deyilir.

BƏƏ Futbol Assosiasiyası vəziyyəti şərh etməkdən imtina edib.

Aut.az