Açıq məktub yazdı – Rəsmən vidalaşdı

İtalyan mütəxəssis Can Piyero Qasperini “Atalanta” azarkeşlərinə açıq məktub yazıb və doqquz illik fəaliyyətdən sonra klubdan ayrıldığını açıqlayıb.

Aut.az xəbər verir ki, məktubu “L’eco Di Bergamo” nəşr edib.

“Son bir neçə saat ərzində mən bu gözəl doqquz illik hekayəyə son qoymaq qərarına gəldim. Ancaq vidalaşmaq haqqında danışmayaq. Bu, mənim xoşuma gəlmir.

Klubla münasibətimin kəsilməsi tamamilə mənim qərarımdı, ona görə də rəhbərlik məsuliyyət daşımamalıdır. Sadəcə anladım ki, bu addımı atmağın vaxtıdır. Bu yaxınlarda başa çatan mövsümdə komandanı mümkün olan ən yüksək mövqedə necə tərk edəcəyimi düşünürdüm. Və mən onu Avropanın ən nüfuzlu stadionlarında oynaya biləcəkləri Çempionlar Liqasına vəsiqə verən üçüncü yerdə təhvil verirəm.

Klubla biz, şübhəsiz ki, əla nəticələr əldə edə bilmişik. Kaş ki, daha çox şey edə bilsəydim, bacarmadım, amma yenə də birlikdə işləyərkən çox əyləndik və əminəm ki, bunu yenə bacaracaqsınız.

“Atalanta”dan niyə ayrıldığımı soruşa bilərsiniz. Yeni çağırışlara ehtiyac olduğu üçün, mənə verilən etimad və onunla gələn yeni ilham səbəbi ilə. Çətin idi? Çox. Amma bu, məni həyəcanlandıran və mənə adrenalin verən böyük bir çağırışdır. Pontida meydanında yenidən görüşəcəyik, söz verirəm! Əlvida!” – Qasperini yazıb.

Qasperininin rəhbərliyi altında “Atalanta” bütün yarışlarda 439 oyun keçirib: 228 qələbə, 101 heç-heçə və 110 məğlubiyyət. 2023/2024 mövsümündə “Atalanta” Avropa Liqasının qalibi olub. Daha əvvəl mətbuatda 67 yaşlı mütəxəssisin “Roma” ilə 3 illik müqavilə imzalayacağı barədə məlumatlar yayılmışdı.

Aut.az