Özünə zərər vermədən karyeranı bitir: Tayson kimi deyir?

WBC versiyası üzrə sabiq dünya çempionu Tayson Fyuri keçmiş rəqibi Deontey Uaylderə müraciət edib.

Aut.az xəbər verir ki, Fyuri onu təqaüdə çıxmağa çağırıb.

“Düzünü desəm, kaş ki, yazıq qoca Deontey boksu tərk etsin. Mən Uaylderi məğlub edəndə o, 43 nokautla 44-0-lıq rekorda sahib idi. Qarşılaşdığı hər kəsi nokaut edirdi.

Açığı, o, mənə üç döyüşü uduzdu (əslində birinci döyüş heç-heçə bitib). Bir-birimizin həyatından uzun illər aldıq. On birinci raundda nokautla başa çatan bu müharibə çox enerji tələb edirdi və belə döyüşlərdən sonra özünə gələ bilmirsən. Trilogiyamızda Uaylderlə mənim aramda on nokdaun oldu.

Hətta geri qayıdanda, Parker və Cana qarşı bir neçə döyüş keçirdikdə belə, o, keçmiş şöhrətinin kölgəsi idi. Deonteydən qalan yeganə şey onun adıdır. Ona görə də mən onun özünə zərər vermədən təqaüdə çıxmasını istərdim”, – Tayson bildirib.

Aut.az