BOK Rusiyanı boykot edən ölkələrə qarşı çıxdı

Beynəlxalq Olimpiya Komitəsinin (BOK) Milli Olimpiya Komitələri (MOK) ilə Əlaqələr Departamentinin direktoru Ceyms Makleod BOK-un Mumbayda keçirilən 141-ci sessiyasında qeyd edib ki, BOK dövlətlərin Rusiya və Belarus idmançılarının yarışlardan tamamilə kənarlaşdırılması ilə bağlı çağırışlarını qəti şəkildə rədd edir.

O qeyd edib ki, artıq bir çox idman federasiyaları neytral idmançıları beynəlxalq yarışlara qaytarıb və bütövlükdə atletika ictimaiyyəti neytral idmançıların geri qayıtmasını dəstəkləyir. Bununla belə, BOK hələ də vəziyyəti izləyir və hökumətlərin müdaxiləsini rədd edir.

Avropa Olimpiya Komitələrinin (AOK) rəhbəri Spiros Kapralos da beynəlxalq federasiyaları BOK-un neytral idmançıların qəbulu ilə bağlı tövsiyələrinə əməl etməyə çağırıb. O qeyd edib ki, Rusiyadan olan bitərəf idmançıların Parisdə keçiriləcək Olimpiya Oyunlarında mümkün iştirakı ilə bağlı qərar qəbul edərkən BOK birliyin və ümumi qaydalara riayət olunmasının vacibliyini nəzərə almalıdır. O, beynəlxalq federasiyaları BOK-un bütün tövsiyələrinə əməl etməyə çağırıb.

2023-cü ilin martında BOK beynəlxalq federasiyalara Rusiyanın Ukraynaya hücumuna dəstək verməyən rus idmançılarına neytral statusda yarışmağa icazə verməyi tövsiyə edib.

Eyni zamanda, BOK silahlı qüvvələr və təhlükəsizlik orqanları ilə əlaqəli idmançıların, eləcə də komanda idman növləri üzrə milli komandaların qəbulundan imtina etməyi təklif edib. Bəzi beynəlxalq federasiyalar Rusiya idmançılarının beynəlxalq yarışlara buraxılması üçün ilkin şərt kimi Ukraynaya hücumu pisləyən bəyannamənin imzalanmasını tələb edirlər.

Aut.az