Təmsilçimizin ÇL-dəki rəqibi nə vaxt müəyyənləşəcək?

Futzal üzrə UEFA Çempionlar Liqasının 2023/2024 mövsümünün püşkatma tarixi və reqlamenti açıqlanıb.

Aut.az xəbər verir ki, 51 ölkəni təmsil edən 55 klub qalib adı uğrunda mübarizə aparacaq.

İlkin və əsas mərhələnin püşkü iyulun 5-də atılacaq. İştirakçı klublar arasında reytinqdə 23-cü pillədə yer alan Azərbaycan çempionu “Araz-Naxçıvan” mübarizəyə ilkin mərhələdən qoşulacaq. Bu mərhələdə 32 komanda 8 qrupda yarışacaq. Yalnız öz qrupunda birinci pilləni tutacaq komandalar və ən yaxşı göstəriciyə malik ikinci yerin sahibi (ümumilikdə 9 komanda) əsas mərhələyə vəsiqə qazanacaq.

Əsas mərhələnin oyunları 24-29 oktyabr tarixlərində keçiriləcək. Dörd ölkə – İspaniya, Portuqaliya, Qazaxıstan və Xorvatiyanın hər biri iki klubla təmsil olunacaq. Xorvatiyanın bu şansı qazanması Rusiyanın FIFA və UEFA tərəfindən cəzalandırılması ilə bağlıdır.

Püşkatma və oyun tarixləri:

İlkin və əsas mərhələnin püşkatması: 5 iyul

İlkin mərhələ: 22-27 avqust

Əsas mərhələ 24-29 oktyabr

Elit raundun püşkatması: 2 noyabr

Elit raund 28 noyabr – 3 dekabr

Final mərhələsi: 2-3, 4-5 may 2024-cü il