Xəbər lenti
Əgər siz “Montsa”nın indiki, “Milan”ın sabiq sahibi və İtaliyanın keçmiş baş naziri Silvio Berluskoninin futboldan daha zəif tərəfini tapmağa çalışırsınızsa, çox axtarmayın. Bir cavab var – qadınlar. Mətbuatın yazdığı sevgi macəralarının sayı-hesabı yoxdur. Don Silvionun yaşadığı həyat onun siyasi karyerasının başa çatması ilə nəticələnib.
Berluskoninin sevgililərinin olduğu uzun siyahıda bir rus adı da var – Rayisa Skorkina. Onun adı İtaliya mətbuatında 2011-ci ildə çıxıb. Silvionun korrupsiya və gözəl qızlarla bağlı yaşadığı qalmaqalla əlaqədar olaraq.
2010-ci ilin sentyabrın 26-da Skorkina Milan yaxınlığındakı San Martino villasından Berluskoniyə zəng edərək “sevgilim, benzinim bitdi” sözlərini deyib. Berluskoni əvvəlcə qadının nə demək istədiyini anlamayıb. Sonra xatırlayaraq “başa düşdüm… Yaxşı, Spinelliyə deyəcəyəm” deyib. İtaliya prokurorluğunun məlumatına görə, Berluskoninin göstərişi ilə məşuqələrinə yüz minlərlə avro paylayan mühasibi Cüzeppe Şpinellinin adını çəkib. Elə həmin gün Skorkina Spinelliyə zəng vurub və rəislə “benzin” haqda danışdığını bildirb.
Rayisa Voronejdə dünyaya gəlib. Maraq naminə modellər üçün kastinq məktəbinə getməyə qərar verib: “Yadımdadır ki, jüri üzvü barmağını mənə tuşlayaraq onlara yaraşdığımı söylədikdə, emosiyalarım coşdu. Hər tərəfim qızardı, sonra solğun oldum”, – deyə o, bildirib.
Skorkina sonra valideynlərinin hesabına modellik məktəbində oxuyub. Model kimi işləmək üçün musiqi təhsilindən imtina edib. 17 yaşında isə İtaliyaya yollanıb. O, bir il yarım yerli moda sənayesində çalışdıqdan sonra yaxşı pul yığaraq Milanda teatr məktəbinə daxil olub. 19 yaşında isə restoran sahibi olan italyanla evlənib. Evliliyi cəmi 6 il davam edib. Berluskoni ilə 2004-cü ildə, tədbirlərin birində tanış olub:
“Həmin gün tədbirdə çox məşğul idim. Yaraşıqlı, əzələli bir kişi mənə yaxınlaşdı. Onu İtaliyanın baş naziri kimi tanımırdım. Çox gözəl olduğumu dedi, telefonumu istədi və uzaqlaşdı. Adamlar mənə tərəf qaçdılar və dedilər ki, kiminlə danışdığını bilirsən? Bu, prezident Berluskoninin özüdür. İtaliyada bir çox yerli sakin Silvionu prezident adlandırır. Onlar üçün o, ölkədə statusuna görə deyil, həyatına görə birinci şəxsdir. Əsl yaraşıqlı kişi idi. Maksimum 40 yaşında görünürdü. İlk görüşümüzü hələ də təfərrüatı ilə xatırlayıram”.
İki gün sonra Berluskoni Raisanı villasına dəvət etdi. Onların macərası üç il davam etdi: “Bu müddət ərzində mən nağıllardakı kimi yaşadım. Amma Silvio həmişə deyirdi ki, mənim üçün çox qocadır. Bilirdim ki, münasibətimiz bizi heç bir yerə aparmayacaq. Biz yaxşı dost olaraq qaldıq. Hələ də ünsiyyət qururuq, lakin nadir hallarda. Onun yeni sevgilisi Françeska çox qısqancdır. Mən o qız haqqında pis bir şey demək istəmirəm… Ancaq münasibətimiz tamamilə dayansa da, yenə də Silvionu qorumaqdan əl çəkməyəcəyəm”.
Skorkina həqiqətən də bütün müsahibələrində (xüsusən də Berluskoni ilə qalmaqallar zamanı) keçmiş sevgilisi haqqında çox yaxşı şeylər danışırdı: “Böyük zəkası olmasına baxmayaraq, gündəlik həyatda o, körpə uşaq kimidir. Sadəlövhdür. Çoxları onun sadəlövhlüyündən istifadə edir. Bəzi hiyləgər qızlar var. Ona deyirlər ki, anam ölür, əməliyyata pul ver. Bir başqası isə əvvəlcə “anam ölür, daha sonra babam yaxşı deyil, sonda isə evimiz dağılır” dedi. Berluskoni kömək istəyənlərin çoxuna pul verirdi. Başa düşürsən ki, çox zəngindir, onun üçün bu pul heç nədir. Qızlara pul vermək müqabilində heç nəyə ehtiyac duymur. O, mehriban insandır və həmişə kömək edəcək. Bu qızlardan bəziləri öz rəfiqələrini onun məclislərinə gətirirdilər. O da necə adamdır, neçə yaşındadır, onu kimin gətirdiyini bilmədən hamını qəbul edirdi”.
86 yaşlı Berluskoni ilə Skorkinanın indi ünsiyyətdə olub-olmadığı məlum deyil. Amma Rayisa hələ də Silvionun doğma şəhəri Milanda yaşayır. (Publika.az)
