Levandovskinin gələcəyi ilə bağlı yeni detallar

Futbol insayderi Fabritsio Romano “Barselona”nın hücumçusu Robert Levandovskinin Kataloniya klubu ilə müqaviləsini uzatmağa yaxın olması ilə bağlı yayılan xəbərlərə münasibət bildirib.

Aut.az xəbər verir ki, Romano YouTube kanalındakı videoda bildirib:

“Son günlərdə Robert Levandovskinin daha bir mövsüm “Barselona”da qalacağı ilə bağlı çoxsaylı şayiələr yayılıb. Reallıq budur ki, Levandovskinin agenti Hansi Flikin agenti və dünyanın ən nüfuzlu agentlərindən biri olan Pini Zahavidir. Onun “Barselona”nın prezidenti Joan Laporta ilə əla münasibətləri var. Zahavi ilə görüşlər zamanı Hansi Flikin yeni müqaviləsi ilə bağlı vəziyyət müzakirə olunub.

Laporta bu yaxınlarda Hansi Flikin tezliklə 2028-ci ilə qədər yeni müqavilə imzalayacağını açıqladı. Bu görüşlərdə Robert Levandovskinin vəziyyəti də müzakirə edildi. Bu müzakirələr zamanı klub və oyunçu onun müqaviləsini daha bir mövsüm uzatmaq imkanlarını araşdırdılar. Lakin hələlik heç bir qərar qəbul edilməyib, heç bir razılıq əldə edilməyib və məsələ hələ də həll olunmayıb.

Levandovski və komandası bir neçə variantı nəzərdən keçirir. Bəli, o, daha bir mövsüm “Barselona”da qala bilər, amma bu, dəqiq deyil. O, maraqlı klubların olduğu Avropada qala bilər və ya üç ildir onunla maraqlanan klubların onu gözlədiyi Səudiyyə Ərəbistanına gedə bilər. MLS-i də unutmayaq, çünki Robert Levandovskiyə oradan da təkliflər var.

Beləliklə, indi Levandovskinin nə istədiyinə qərar verməsi üçün sözü ona verəcəyik: “Barselona”da qalmaq, Avropada qalmaq, Səudiyyə Ərəbistanına getmək və ya MLS-ə keçmək. Beləliklə, qərar Levandovskinindir. Onun agentləri sadəcə ona bütün mümkün variantları təklif etmək üçün çalışırlar”.

Aut.az