“Real”ın futbolçuları şokda: Alonsonun gedişindən xəbərsiz olublar

“Real”ın futbolçuları baş məşqçi Xabi Alonsonun vəzifədən uzaqlaşdırılacağını gözləməyiblər.

Aut.az xəbər verir ki, bu barədə “Marca” məlumat yayıb.

Madrid klubunun bəzi üzvləri onun gedişindən klubun rəsmi açıqlaması vasitəsilə xəbər tutublar. Soyunub-geyinmə otağında mövsümün bu mərhələsində belə miqyaslı qərarı heç kim gözləmirmiş. Xüsusilə final oyunu ilə bağlı təəssüratlar və məğlubiyyətə baxmayaraq, evə dönüş zamanı təyyarədə hökm sürən sakit atmosfer fonunda bu qərar futbolçular üçün gözlənilməz olub.

Superkubokun finalından sonra oyunçular Alonsonun postunda qalacağına əmin idilər. “Barselona”ya minimal hesablı məğlubiyyəti nəzərə alaraq, rəhbərliyin baş məşqçi dəyişikliyini düşünməsi üçün heç bir səbəb görmürdülər. Əksinə, komanda layihənin davam etdiyini və turnir bitdikdən sonra Alonsonun klub tərəfindən tam dəstəkləndiyini düşünürdü. Buna mükafatlandırma mərasimində prezident Florentino Pereslə baş məşqçi arasında olan səmimi qucaqlaşma da sübut kimi göstərilirdi.

Bu səbəbdən onun ayrılığı ilə bağlı açıqlama komanda üçün əsl şok effekti yaradıb. Bir neçə futbolçu etiraf edib ki, xəbəri əvvəlcədən xəbərdarlıq olmadan, yalnız rəsmi bəyanatdan öyrəniblər ki, bu da anlaşılmazlığı daha da artırıb. Bəzi oyunçuların sözlərinə görə, son həftələrdə baş məşqçi ilə soyunub-geyinmə otağı arasındakı münasibətlər daha da yaxşılaşmışdı.

Aut.az