“Barselona”nın planları dəyişdi

“Barselona” adət etdiyi hazırlıq cədvəlindən kənara çıxacaq. Kataloniya klubu bazar günü günorta saatlarında “La Seramika” stadionunda “Vilyarreal”a qarşı keçiriləcək 2025-ci ilin son oyunu öncəsi hazırlıq planında dəyişiklik edib.

Aut.az xəbər verir ki, Adətən komanda şənbə günü saat 11:00-da məşq edir, ardından baş məşqçi Hansi Flikin saat 13:00-da mətbuat konfransı baş tutur. Lakin bu oyun üçün qrafik logistika səbəblərinə görə yenilənib.

Flik ənənəvi olaraq mətbuat qarşısına saat 13:00-da çıxacaq, lakin komandanın “Ciutat Esportiva”dakı məşqi bu dəfə mətbuat konfransından dərhal sonra, günortadan sonra keçiriləcək.

Bu dəyişiklik futbolçuların məşqdən dərhal sonra “Vilyarreal”a yola düşməsinə imkan verəcək. Komanda şənbə axşamı uçuşla oyunun keçiriləcəyi şəhərə gedəcək və bazar günü saat 16:15-də başlayacaq qarşılaşma öncəsi gecəni orada keçirəcək.

Belə erkən səfərin məqsədi bazar günü günorta saatları ilə bağlı yarana biləcək risklərin qarşısını almaq və optimal istirahət şəraiti yaratmaqdır.

Çempionlar Liqası oyunlarında UEFA protokollarına görə tez-tez fərqli qrafiklər tətbiq olunsa da, bu dəyişiklik daxili çempionat oyunlarında praktik yanaşmanın ön planda olduğunu göstərir.

Aut.az