NBA oyunçusu saxlanıldı

“İndiana Peysers”in müdafiəçisi Kem Cons məşqə gedərkən saxlanılaraq həbs edilib.

Aut.az xəbər verir ki, bu barədə “Fox59” məlumat yayıb.

Hadisə bazar ertəsi səhər baş verib. Basketbolçu ehtiyatsız sürücülük və saxlanılma zamanı müqavimət göstərməkdə ittiham olunaraq Merion dairə həbsxanasına aparılıb.

Məhkəmə sənədlərinə görə, yerli vaxtla saat 9:45-də polis 90 mil sürətlə (təxminən 145 km/saat) hərəkət edən qara “Cadillac”ı görüb. Həmin ərazidə maksimal icazə verilən sürət 50 mil (80 km/saat) idi. Bildirilir ki, sürücü dönmə işarəsi vermədən zolaqları dəyişib və digər avtomobillərə çox yaxın məsafədə hərəkət edib.

Polis avtomobili saxlamaq istəsə də, sürücü I-70 şossesindən I-65 istiqamətinə dönərək cənuba doğru hərəkətini davam etdirib və yalnız Fletçer prospektində dayanıb. Daha sonra sürücü Tennessi ştatının sürücülük vəsiqəsinə əsasən Kem Cons avtomobildən çıxarılıb, ikiqat kilidli qandal taxılıb və hüquqları oxunub.

Sənədlərdə qeyd olunur: “Cənab Cons bildirib ki, sürət həddini aşdığını bilməyib və “Peysers”in məşqinə gecikir. O həmçinin polis avtomobilinin siqnalını gördüyünü, lakin bunun ona yönəldiyini anlamadığını deyib”.

Dindirilmədən sonra basketbolçu saxlanılıb, avtomobili isə evakuatorla aparılıb. Onlayn həbsxana qeydlərinə əsasən, Cons hazırda Merion dairəsinin yetkinlər üçün saxlanma mərkəzindədir. Yerli vaxtla saat 13:00-a olan məlumata görə, onun üçün girov hələlik təyin edilməyib.

“İndiana Peysers” klubunun rəsmi açıqlamasında deyilir: “Biz Kem Consla bağlı vəziyyətdən xəbərdarıq. Hazırda əlavə məlumat toplayırıq və bu məsələ barədə başqa şərh verməyəcəyik.”

Əgər 23 yaşlı basketbolçu polisə müqavimət göstərməkdə təqsirli bilinsə, bu, 6-cı səviyyəli ağır cinayət sayılacaq və o, 2,5 ilədək həbs və 10 min dollara qədər cərimə ilə üzləşə bilər.

Qeyd edək ki, Cons 2025 NBA seçməsində “San Antonio Spörs” tərəfindən 38-ci ümumi seçimlə seçilmiş, daha sonra “İndiana”ya dəyişdirilmişdi. İyulun əvvəlində “Peysers” onunla 4 illik müqavilə imzalamışdı.

Aut.az