“Qalatasaray” azarkeşləri “Liverpul”un futbolçularını yuxudan belə oyatdılar – VİDEO

30 Sentyabr 2025

“Liverpul” futbolçuları Çempionlar Liqasında “Qalatasaray”a qarşı oyun öncəsi Türkiyədə gözlənilməz gecə sürprizi ilə üzləşiblər.

Aut.az xəbər verir ki, sentyabrın 30-na keçən gecə, komandanın əksər üzvləri vacib görüşdən əvvəl dincəlməyə çalışarkən, İstanbul klubunun azarkeşləri ingilislərin qaldığı otelin qarşısında möhtəşəm fişəng nümayişi təşkil ediblər.

Arne Slot və onun ulduz futbolçuları yuxudan qəfil oyanmalı olublar, çünki atəşfəşanlığın səsi bütün ətrafı bürüyüb.

Parlaq gecə şousunun görüntüləri yerli vaxtla saat 03:55-də sosial şəbəkələrdə yayılıb və qısa müddətdə futbol azarkeşləri arasında böyük maraq doğurub.

Xatırladaq ki, Çempionlar Liqasının “Qalatasaray” – “Liverpul” qarşılaşması bu gün, sentyabrın 30-da keçiriləcək və Bakı vaxtı ilə saat 23:00-da start götürəcək.

Aut.az