İki gün içirdim, çıxıb qol vururdum və yenə iki gün içirdim – Runidən etiraf

Ueyn Runi spirtli içki ilə bağlı problemlərindən və həyat yoldaşı Kolinin köməyindən danışıb.

Aut.az xəbər verir ki, “Mançester Yunayted”in keçmiş müdafiəçisi və kapitanı bu barədə Rio Ferdinandın podkastında danışıb:

“Kolin başqa bir şeydir. Biz Krokstedən (Liverpulun ətrafı) olan uşaqlarıq, birlikdə böyümüşük, tanış olmağa başlamışıq, evlənmişik və uşaq sahibi olmuşuq.

17 yaşım olandan o bilirdi ki, mən bir az ağlımı itirmişəm. Futbolu sevirdim, ona aludə idim, amma əylənməyi də sevirdim. O, bunu erkən fərq etdi və məni nəzarətdə saxladı, özümü nəzarətdə saxlamağa kömək etdi. Hərdən deyirdi ki, sən nə edirsən? Məni idarəçi kimi idarə edirdi. Düzünü desəm, düşünürəm ki, o olmasaydı, mən öləcəkdim. Mən buna əminəm.

Nə edir… Hərdən bezdirir, fikirləşirəm ki, “nə edirsən?”. Amma onun etdiyi hər şey ona görədir ki, mən bu dünyada qalıb daha yaxşı insan ola bilim. Keçmişdə səhvlər etmişəm və çoxları bu səhvləri bilir. Bəzən mən başqalarından fərqli davranıram və o, mənə düz yolda qalmağa kömək edir. O, 20 ildən çoxdur ki, bu işlə məşğuldur.

Həyatımı yaşamaq, evdən çıxmaq və dostlarımla olmaqdan həzz almaq istəyirdim. Və çox uzağa getdim. Həyatımda mübarizə apardığım vaxtlar olub (alkoqol asılılığı ilə). Kiməsə müraciət edə biləcəyimi düşünmürdüm. İstəmirdim, çünki heç kimə yük olmaq istəmirdim.

Məşqə gəldiyimi, gözümə damcı sürtdüyümü və saqqız çeynədiyimi xatırlayıram. Sadəcə iki gün içirdim, sonra məşqə gəlirdim. Həftə sonu bir neçə qol vururdum, sonra qayıdıb iki gün fasiləsiz içirdim”.

Runi Kolinlə 2008-ci ildən evlidir. Cütlüyün dörd oğlu var: Kay Ueyn (2009-cu il təvəllüdlü), Kley Entoni (2013-cü il təvəllüdlü), Keyt Cozef (2016-cı il təvəllüdlü) və Kass Mak (2018-ci il təvəllüdlü).

Aut.az