Koxalski polyaklara “Qarabağ”, Qurbanov və Bakıdan elə sözlər dedi ki…

“Qarabağ”ın polşalı qolkiperi Mateus Koxalski ölkəsinin mətbuatına müsahibə verib.

Publika.az xəbər verir ki, o, “Qarabağ”la Çempionlar Liqasına vəsiqə qazanmasından, Bakıdakı həyatından və gələcək planlarından danışıb.

– Tezliklə Çempionlar Liqasında oynayacağınız ağlınıza gələrdimi?

– Bir az şokdayam, amma çoxdan bilirəm ki, futbolda heç nəyi istisna etmək olmaz. İşlər sürətlə dəyişir. 2022-ci ilin aprelində “Radomyak” üçün Ekstraklasda debüt etdim, burada “Krakoviya”ya uduzduq və çox məyus oldum. İki ildən sonra “Qarabağ”ın heyətində Avropa Liqasında oynayırdım və dərhal Londonda 50 mindən çox tamaşaçı kütləsi qarşısında son çempion “Tottenhem”lə qarşılaşmalı oldum. Həmin yarışda uğurlu çıxış etmədik, lakin “Tottenhem”, “Lion”, “Ayaks”, və “Olimpiakos” kimi rəqiblərə qarşı matçlarda qazandığımız təcrübə öz bəhrəsini verir. Həlledici mərhələdə “Ferentsvaroş”la asan olmadı, baxmayaraq ki, Budapeştdə (3:1) parlaq performansla qalib gəldik. Cavab görüşündə Macarıstan çempionu 3:2 hesabı ilə qalib gəlsə də, məqsədimizə nail olduq.

– Polşalı futbolçu üçün Azərbaycan klubunun vasitəsilə Çempionlar Liqasına düşmək Ekstraklasadan daha asandır?

– “Stal Mieleç”də çıxış edəndə Polşanın digər klublarından mənə təklif yox idi, sadəcə “Qarabağ”dan. Bu komanda ilə Azərbaycanda ən yüksək hədəflər uğrunda mübarizə aparıram və Avropa yarışlarında iştirak edirəm ki, bu da mənim atletik inkişafıma zəmanət verir. Dörd Polşa komandasının UEFA Konfrans Liqasına vəsiqə qazanmasına çox şadam, amma Çempionlar Liqası, deyək ki, iki pillə yüksəkdir. İnanıram ki, tezliklə Polşanın yenidən orada təmsilçisi olacaq, amma indi “Qarabağ”la bağlı öz hekayəmi yazıram. Bu elit yarışın liqa mərhələsindəki rəqiblərimizin siyahısını görmək məni həyəcanlandırır. “Benfika”, “Kopenhagen”, “Athletik Bilbao”, “Çelsi”, “Napoli”, “Ayaks, “Ayntraxt” və “Liverpul” ilə qarşılaşacağıq. Bu gözəl bir şeydir və ən çətin anlarda təslim olmamağın mükafatıdır.

– “Qarabağ”ın uğurunun sirri nədədir?

– Bu, sözsüz ki, uzun illər “Qarabağ”da çalışan məşqçi Qurban Qurbanovla bağlıdır. O, hücum futbolu, pressinq və oyunçu yaradıcılığını vurğulayır. Rəqibin səviyyəsindən asılı olmayaraq, həmişə hücuma keçməyə çalışırıq. Eşitmişəm ki, bizə “Azərbaycan “Barselona”sı” deyirlər, amma biz “Qarabağ”ıq. Oyunçular müxtəlif ölkələrdən olsalar da, paltardəyişmə otağında əla atmosfer var. Komanda yoldaşlarımla ingilis dilində ünsiyyət qururam və rus dilində də bir neçə söz öyrənirəm. Ən əsası odur ki, bizi futbolun dili birləşdirir. Mən təzyiq hiss etmirəm, azarkeşlər bilirlər ki, biz əlimizdən gələni edirik. Ötən mövsüm onlar məyus oldular, amma biz ölkə çempionatında qalib gəlməklə və Çempionlar Liqasına vəsiqə qazanmaqla bunu kompensasiya etdik. Bu da azərbaycanlılara böyük sevinc bəxş etdi. “Qarabağ”ın uğurları sayəsində yerlilər millinin irəli gedəcəyinə inana bilər. Təbii ki, keyfiyyətli futbolçular az deyil. Mənim 7 komanda yoldaşım Azərbaycan milli komandasında oynayır. “Qarabağ”ın Çempionlar Liqasındakı oyunu əcnəbi klubları azərbaycanlı futbolçuları transfer etməyə həvəsləndirməlidir. Onların bir çoxu yüksək liqalarda uğur qazanacaq.

– Sentyabrda Polşa millisinə çağırılacağınızı düşünürdünüz?

– Artur Boruç, Voysyex Şesni və Lukaş Fabianski top klubların rənglərini qoruyarkən buna arxalana bilərdilər. Fikrimdə milli komanda var idi, amma qapı xəttində inanılmaz rəqabət var. İyun ayında çağırıldım, amma indi mənim adım seçilmiş qruplar arasında deyil, amma ümidlərimdən, arzularımdan əl çəkməmişəm. Daim çox çalışıram və əldə etdiyim nailiyyətlərlə dincəlmək fikrim yoxdur.

– Azərbaycanda həyatınız necədir?

– Mən əvvəllər Bakının mərkəzində yaşayırdım, amma kənarda daha böyük bir evə köçdüm. Bura daha sakitdir. Hələlik mən təkəm, sevgilimlə itimizin həmişəlik gəlişini gözləyirəm. Əla şəraitim var, ona görə də diqqətimi futbola yönəldə bilirəm. Azərbaycan mətbəxinu sevirəm. Türk elementləri var və Polşa mətbəxi ilə oxşarlıqlar da var. Burada nəqliyyat gərgin ola bilər və bəzən klubun bazasına çatana qədər əsəblərim pozulur. Çünki burada az sayda sürücü sakitdir. Mübahisələri müxtəlif yollarla həll etdiklərini eşitmişəm, amma xoşbəxtlikdən bunu yaşamamışam.

– Azərbaycanı turistlərə tövsiyə edirsiniz?

– Bakı çox gözəl şəhərdir. Burada həqiqətən görmək üçün bir şey var, ancaq hava isti olmayanda buranı ziyarət etməlisiniz. Yerli əhali paytaxtın Azərbaycanın vizit kartı olduğunu bildiyi üçün onu təmiz saxlayır. Turistlərin qayğısına qalırlar. “Qarabağ”ın Çempionlar Liqasında iştirakı çoxlu turist cəlb etməlidir, xüsusən də ev sahibi kimi maraqlı rəqiblərimiz var.

– Çox yaxşı oynasan, “Qarabağ” səni xarici klubda oynamağa qoyacaq?

– Görəyəcyik, hər şey mümkündür. Nə vaxtsa İngiltərə çempionatında meydana çıxmaq əla olardı və mənim Premyer Liqa komandalarına qarşı bacarıqlarımı nümayiş etdirmək üçün fantastik fürsətim olacaq. Bundan maksimum yararlanmaq üçün əlimdən gələni edəcəyəm. Mən hələ də ayaqlarımı yerdə saxlayıram və xoşbəxtəm ki, mənim futbol səyahətim belə canlı xarakter alıb. “Stal Mieleç”də tam bir mövsüm oynadıqdan sonra Çempionlar Liqasına yüksələn bir kluba qoşulmağım əla şeydir