DÇ-2026-nın biletləri satışa çıxarılır: Bu tarixdən

DÇ-2026-nın bilet satışı proqramının birinci mərhələsi 2025-ci il sentyabrın 10-da başlayacaq.

Aut.az xəbər verir ki, bu barədə Beynəlxalq Futbol Federasiyasının ( FİFA ) saytında məlumat verilib.

Azarkeşlər biletlər üçün sentyabrın 10-dan müraciət edə biləcəklər. Ərizələrin sayı biletlərin sayından çox olarsa, qaliblər təsadüfi seçimlə seçiləcək. Biletlərə gözlənilən yüksək tələbat səbəbindən onlar mərhələli şəkildə buraxılacaq.

Qeyd olunur ki, azarkeşlərə artıq FİFA-nın saytındakı bölmədə qeydiyyatdan keçmək və xüsusi identifikator yaratmaq tövsiyə olunur, onsuz bilet almaq mümkün olmayacaq.

“ABŞ-da keçirilən Klublararası Dünya Çempionatının inanılmaz uğurundan sonra Dünya Çempionatına maraq yeni zirvələrə çatır. Biz dünyanı Kanada, Meksika və ABŞ-ın tarixin ən böyük və ən möhtəşəm idman tədbirinə ev sahibliyi edəcəyi Şimali Amerikaya qayıtmağı səbirsizliklə gözləyirik”, – FIFA prezidenti Canni İnfantino bildirib.

2026-cı il dünya çempionatı 11 iyun – 19 iyul tarixlərində ABŞ, Meksika və Kanadada keçiriləcək və ilk dəfə olaraq 48 komanda iştirak edəcək. Dekabrda turnirin final mərhələsinin püşkatma mərasimi keçiriləcək.

Aut.az