Pul lazımdır: Messinin nömrəsi ona verilir – Artıq satış rekordu qırılır

Lamin Yamal “Barselona”da 10 rəqəmini alacaq, bu, hər kəsə aydındır.

Aut.az xəbər verir ki, oyunçu iyulun 13-dən, 18 yaşı tamam olduqdan sonra “Barsa”dan rəsmi olaraq 10 nömrəni istəyib və klub güzəştə gedib.

Kataloniyalılar artıq 2025/26 mövsümü üçün ev formalarını təqdim edib satışa çıxarıblar, lakin azarkeşlər hələ mağazalarda Laminin 10 nömrəli yeni formasını tapa bilməyəcəklər. Azarkeşlər ağıllıdırlar: arxa tərəfində yazı olmayan formalar alırlar, sonra isə əlavə ödəniş müqabilində onlara Yamalın adını və 10 rəqəmini əlavə edirlər.

“Barselona” pul itirmək istəmir. AS-ın yazdığı kimi, klubun mağazalarındakı işçilər müştərilərə xəbərdarlıq edir: nömrə və futbolçunun adının formada necə yazılacağı rəsmən təsdiqlənmədiyi üçün alıcı riskə gedir.

Laminin fərqli nömrə seçdiyi üzə çıxsa, klubun mağazaları nə iddiaları qəbul etməyəcək, nə də xərclənən pulu geri qaytarmayacaq.

Yerli sakinlər üçün bu problem deyil, onlar gözləyə bilərlər, lakin bir neçə gün ərzində Kataloniyanın paytaxtına gələn turistlərin sevimli komandasının fan-şopunda alış-veriş etmək üçün vaxtları məhduddur. Turistlər oyunun şərtlərini qəbul edir və arxasına “10” əlavə edərək Yamalın formalarını alırlar.

“Bu gün demək olar ki, heç kim Laminin 19 nömrəli formasını seçmir”, – AS klubdan sitat gətirib.

Nəşrin əlavə etdiyi kimi, “Barsa”nın marketinq departamenti yaxşı bilir ki, klub nömrə dəyişikliyini rəsmi olaraq elan etdikdə yeni formanın satışları sürətlə artacaq, xüsusən də formanın üzərinə “10” olarsa. AS klubdakı mənbəyə istinadən yazır:

“Artıq klubun tarixində ən çox satılan formadan danışa bilərik. Söhbət hazırda Lionel Messinin rekordundan 20% və ya 25% yüksək olan satışlardan gedir”.

“Nike” həmçinin Laminin adı və yeni nömrəsi olan formaların satışına başlaya biləcəyi günü səbirsizliklə gözləyir. Şirkət rəhbərliyi anlayır ki, məhsul bir neçə gün ərzində satıla bilər.

Aut.az