Meydanda ürəyi dayanan futbolçunun səhhəti necədir?

İngiltərə çempionatının 17-ci turunun “Bornmut”la oyununda ürək tutması keçirən “Luton Taun”un müdafiəçisi Tom Lokyer səhhəti haqda danışıb.

“Sadəcə demək istəyirəm ki, Bornmutda ürək tutmasından sonra özümü yaxşı hiss edirəm. Özümü bu qədər yaxşı hiss etməyimin səbəbi oyunçuların, işçilərin, həkimlərin və tibb işçilərinin qəhrəmancasına hərəkətləridir. Şükür edirəm ki, bütün bu qəhrəmanlar çətin anımda yanımda olublar. Onlar mənim həyatımı xilas etdilər. Mənim üçün etdiklərini heç vaxt unutmayacağam.

Oynamadığıma görə kədərlənsəm də, oğlanların mənsiz mübarizəni davam etdirməsinə baxmaqdan qürur duyuram. Onların son matçlarda gördüyüm mübariz ruhu mənə çox lazım olan ruh yüksəkliyi verdi. Məşqçiyə və kluba kömək etmək üçün əlimdən gələni edəcəyəm. Bunu hansı şəkildə edəcəyimi görmək qalır, çünki yeni ildə mütəxəssislərlə görüşməli olacağam”, – jurnalist Fabritsio Romano Lokyerdən sitat gətirib.

Xatırladaq ki, bir müddət əvvəl “Luton Taun”un baş məşqçisi Rob Edvards “Nyukasl Yunayted”lə son oyundan (1:0) əvvəl Lokyerin ona mesaj göndərdiyini və meydana çıxmaq üçün səbirsizləndiyini yazdığını bildirmişdi.

Aut.az