Xəbər lenti
– Vacib qələbə idi. Şükürlər olsun, futbolçular özlərini tam yaxşı tərəfdən göstərdilər. Oyunçuların fikrinin bu oyunda olmağı vacib idi.
– Çempionatı təhlil edəndə belə hiss olunur ki, “Qarabağ” diqqət pozuntusu yaşayır. Bu haqda nə düşünürsüz?
– Bəlkə də, son vaxtlar dəyişik çempionat oldu. Heç bir rəqibə fərq qoymuruq. Bu gün bütün komandaların gücü bəllidir. İstənilən rəqib bir-birinə qalib gələ bilər. Sadəcə bizim sıx qrafikimiz var. Futbolçuları nə qədər hazırlamağa çalışsaq da, yorğunluq fonunda çətindir. Rotasiyalar çox edirik. Bəzi oyunçuları meydana da buraxmırıq. Oyunçuları qorumaq istəyirik. Belə qrafikdə olmağımız ilk deyil. Sadəcə bu il zədəlilərimiz çox idi. İtkilər komandaya zərbədir. Qarşıdakı oyunlarda daha ciddi olmalıyıq. Bəzən risklərə getməliyik ki, xal ehtiyatımızı yaxşılaşdıraq. Hər məğlubiyyət, heç-heçə bizə zərbə ola bilər.
– Yerli oyunçu baxımından sıxıntı olduğu hiss olunur… Bu gün Amin Ramazanova şans verdiz.
– Bəli, problemlərimiz var. Amin Ramazanov gənc olsa da, az oyunda iştirak etməyib. Ona güvənirik, nə qədər çox matça çıxsa, yaxşıdır. İstənilən oyunçunu meydana buraxmağa çəkinməyəcəyik. Ehtiyac olarsa, istifadə edəcəyik.
– Diakabinin Avropa Liqasının oyunları üçün sifariş olunmaması nə ilə bağlıdır?
– Mikro zədələri var. Bəzən tam güclə məşq edə bilmir. Bir müddət geridönüş etmişdi, oyunlarda özünü göstərmişdi. İndi isə mikrozədələr qarşısını alır. Keçmiş formasına qayıda bilsə, ondan yenidən istifadə edəcəyik.
– “Qarabağ” üçün transfer məsələsi bağlanıb?
– Ehtimal ki, bitib. Çünki bundan sonra ancaq azad agent olan oyunçunu götürə bilərik və onun da formasının hansı səviyyədə olduğu sual altındadır. Ola bilər, dekabra qədər transfer olmasın. Ancaq yeni oyunçu istərdim. Gözləyəcəyik, axtarışda olacağıq.
– Hesab daha fərqli ola bilərdi. Qolunuz qeydə alınmadı. Bugünkü matçda hakimliklə bağlı düşüncələriniz nədir?
– Qarşımızda intizamlı komanda var idi. “Sabah”a qarşı oynamaq asan deyil. Qələbə böyük nəticədir. Hakimliklə bağlı bilmirəm… Getdikcə xırda epizodlara daha çox diqqət ayırırlar. “Səbail”lə oyunda qapımıza təyin olunan penalti və başqa epizodlarda bəsit qərarlar oldu. Hakimlərə etirazımız olmayıb. Bu gün də qol və penaltidə ofsayd olduğunu bilmirəm. Onlar yaxşı bilir. Səhvlər nəticəyə böyük təsir göstərə bilər. Biz hakimlərimizə inanırıq. İnanırıq ki, hamıya eyni gözlə baxırlar. İşimiz meydanda daha intizamlı olmaq və oynamaqdır.
– Lunyovun oyun praktikası azdır. Bu, sizi narahat etmir?
– Xeyr. Mən narahat olsam, komanda da narahat olacaq. Lunyova inanırıq. İki-üç oyundan sonra özünü daha hiss edər. Narahatlığım yoxdur.
– Cinahdan hücumlar zamanı oyunçular asmalar əvəzinə geri çəkilir, uzaqdan zərbə endirir. Bu əvvəldən hazırlanmış bir şey idi?
– Fərqli hücumlarımız olur. Son qərarı futbolçular verir. Bu, normaldır. Xüsusi tapşırıq yox idi. Oyunçular düzgün qərar verməyə çalışır.
– Şahruddin Məhəmmədəliyevin “Adana Demirspor”a keçidi necə baş tutdu?
– Özü və klub üçün yaxşı təklif oldu. Qarşılıqlı razılaşdıq və qərara gəldik ki, getməsinə şərait yaradaq. Türkiyə Super Liqasına Azərbaycandan, “Qarabağ”dan oyunçu gedirsə, buna sevinməliyik. Son vaxtlar böyük “bazar”a girmişik. Artıq Azərbaycan futboluna maraq çoxalıb. Kadi Borges Rusiyaya, İbrahima Vadji Fransaya getdi. Onların getdikləri yerdə bizdən, ölkədən danışması faydalıdır. Bu, bütün oyunçular üçün yaxşıdır. Azərbaycan futboluna maraq artır, təkliflər çoxalır. Hər oyunçuya təşəkkür edirəm. Hər futbolçu öz səhvini başa düşməli və təkrarlamamalıdır. Bu, futbolçulardan tələbimizdir.
– Bəhlul Mustafazadə son oyunlarda yaxşı formadadır. Zədəsi nə yerdədir, “Molde” ilə matçda oynaya biləcək?
– Ağrısı var. İnşallah, ciddi problem olmamalıdır. Sadəcə həkimlərin ilkin rəyinə görə, zərbə sinir nöqtəsinə dəyib və ayağında keyləşmə yaranıb. İnşallah, böyük problem olmaz. Sabah müayinə olunandan sonra dəqiq fikir bildirə bilərik. Son matçlarda yaxşıdır. Lakin bəzi şeylər var, daha yaxşılaşdırmalıdır. Bəhlulun hazırda pik nöqtədə olduğunu deyə bilmərik.
– “Molde”ni təhlil etməyə başlamısız?
– Tam yox, bir az. Ciddi rəqibə qarşı oynayacağıq. “Qalatasaray”la oyunlarına və çempionat matçlarına baxmışıq. Fərqli sistemdə oynayırlar. Nəticə üçün oynamağı sevən komandadır. Oyunun gedişində ciddi dəyişikliklər edirlər.
– “Adana Demirspor”un Toral Bayramovu da transfer etmək istədiyi deyilir. Nə dərəcə düzgündür?
– Xeyr, elə bir məlumatımız yoxdur. Təklif gəlməyib.
