Ronaldonun uşaqlığından danışdı: O, niyə ağlayırdı?

Portuqaliya millisinin sabiq hücumçusu Nani uşaqlıq xatirələrini bölüşüb.

Aut.az xəbər verir ki, o, sabiq komanda yoldaşı Kriştiano Ronaldo ilə birlikdə oynadığı dövrləri yada salıb.

39 yaşlı futbolçunun sözlərinə görə, ulduz həmkarı gənc yaşlarından digər uşaqlardan fərqlənib. O, yalnız qələbəyə fokuslanıb və uğursuzluqlara çox emosional reaksiya verib.

“Bizdə ambisiyalar və arzular var idi ki, bir gün peşəkar futbolçu ola bilərik, amma eyni zamanda bilirdik ki, bunu həqiqətən əldə etməyincə, bu yalnız bir illüziya idi. Sonda hər şey çox sürətlə baş verdi. İmkanlar ortaya çıxdı və biz onları qaçırmadıq. O gənc yaşımızda sahib olduğumuz fədakarlıq ruhu əsas oldu.

Hətta uşaq ikən o, hamıdan fərqlənirdi. O, nə istədiyini dəqiq bilirdi. Kriştiano futbolu böyük ehtirasla yaşayırdı. Əgər qalib gəlmirdisə və ya nəsə düzgün getmirdisə, ağlayırdı. Bu, onun işinə nə qədər sadiq olduğunu və oyunu necə intensiv yaşadığını göstərirdi”, – deyə Nani bildirib.

Qeyd edək ki, hər iki portuqaliyalı karyerasına “Sportinq”də başlayıb. Sonradan onlar birlikdə “Mançester Yunayted” və milli komandada çıxış ediblər.

Hazırda Nani Qazaxıstanda Aktobe klubunda oynayır. Kriştiano Ronaldo isə Səudiyyə Ərəbistanında “Əl-Nəsr” üçün çıxış edir və karyerasında 1000 qol hədəfinə çatmağa çalışır. Hazırkı aktivində 962 qol var.

Aut.az