BOK müraciət yaydı: Olimpiadanın açılış mərasimində amerikalıları alçaltmayın

BOK, 6 fevralda Milan-Kortinada keçiriləcək 2026-cı il Qış Olimpiya Oyunlarının açılış mərasimində Amerika idmançıların fitə basılmayacağına ümid etdiyini bildirib.

Aut.az xəbər verir ki, narahatlıqlar, Tramp administrasiyasının sərt immiqrasiya siyasəti fonunda İtaliyada etirazlara səbəb olan ABŞ İmmiqrasiya Xidmətləri (ICE) agentlərinin Olimpiya Oyunlarında iştirakından qaynaqlanır.

BOK prezidenti Kirsti Koventri hörmətə və birliyə çağırıb.

ABŞ vitse-prezidenti Ciy De Vens və dövlət katibi Marko Rubionun mərasimdə iştirakı gözlənilir.

Beynəlxalq Olimpiya Komitəsi 2026-cı il fevralın 6-da Milanda keçirilməsi planlaşdırılan XXV Qış Olimpiya Oyunlarının açılış mərasiminin qarşılıqlı hörmət atmosferində keçiriləcəyinə və ABŞ nümayəndə heyətinə qarşı heç bir narazılıq ifadəsi ilə pozulmayacağına ümid etdiyini bildirib. Təşkilat, həmçinin “San Siro” stadionunda tamaşaçıların amerikalı idmançılara və ya rəsmi şəxslərə qarşı etiraz etmələrinin potensial riskini qeyd edib.

Narahatlıqlar, Oyunlarda təhlükəsizliyi təmin etmək üçün ABŞ İmmiqrasiya və Gömrük Mühafizəsi (ICE) zabitlərini və Sərhəd Patrul agentlərini yerləşdirmək qərarından irəli gəlir. ICE-nin Daxili Təhlükəsizlik Təhqiqatları Bölməsi 6-22 fevral tarixlərində ABŞ Dövlət Departamentinin Diplomatik Təhlükəsizlik Xidmətini dəstəkləyəcək. Bu qərar, xüsusən də Tramp administrasiyasının sərtləşdirdiyi immiqrasiya siyasəti fonunda İtaliya cəmiyyətində və siyasi xadimlər arasında tənqidlərə səbəb olub. Qeyri-adi əməliyyatların planlaşdırılmadığına dair rəsmi zəmanətlərə baxmayaraq, İtaliyada ICE agentlərinin ölkə ərazisində olmasına qarşı etirazlar başlayıb.

Aut.az