Prezident təklif etdi: Komanda sayı 16-ya endirilsin

İtaliyanın “Napoli” klubunun prezidenti Aurelino De Laurentis A Seriyasının 16 komandaya endirilməsini təklif edib.

Aut.az xəbər verir ki, o, bu barədə “Corriere della Sera”ya açıqlama verib:

“Sistem bütün Avropada dağılmış vəziyyətdədir və böyük borcları ödəmək üçün inqilabi və sürətli islahatlara ehtiyac var. Daha çox oyun keçirilir, buna görə də daha çox futbolçu tələb olunur, bu isə xərclərin artmasına gətirib çıxarır.

Ümid edirəm ki, A Seriyasında 1986-cı ildə olduğu kimi 16 komanda qalacaq. Bu, klubların əsas dəyəri olan futbolçuların ciddi yorğunluğunun və onların qiymətinin düşməsinin qarşısını alacaq.

16 komandadan ibarət turnir həm də yalnız bir neçə min tamaşaçının ekran qarşısına toplandığı, İtaliya futbolunun kommersiya cəlbediciliyini azaldan oyunları aradan qaldırardı. Bir çoxları hesab edir ki, bu, gəlirləri azaldacaq, amma bu, doğru deyil, çünki digər oyunların dəyəri artacaq”.

Xatırladaq ki, hazırda A Seriyasında 20 komanda iştirak edir.