Xəbər lenti
Azərbaycan Premyer Liqasının 17-ci turu iki futbolçunun ölkə çempionatında yubiley oyununu keçirməsi ilə əlamətdar olub.
Aut.az xəbər verir ki, “Qarabağ”ın müdafiəçisi Maksim Medvedev “Qəbələ” (1:0), “Sumqayıt”ın arxa xətt oyunçusu Vurğun Hüseynov “Səbail”lə qarşılaşmada (2:0) 350-ci matçını qeyd edib. Hər iki kapitan 350-ci görüşünü doğma meydanda keçirib. Bununla da 1992-ci ildən keçirilən yarışda 350 və daha çox oyuna çıxanların sayı 12-yə çatıb. Maksimlə Vurğuna qədər 10 futbolçu buna nail olub.
Debütü 2006/2007 mövsümünə təsadüf edən Maksim bu müddətdə 12 qol vurub. 33 yaşlı müdafiəçi yalnız “Qarabağ”da forma geyinib. O, bir klubda ən çox oyun keçirən futbolçudur.
İlk oyunu 2005/2006 mövsümünə təsadüf edən Vurğunun hesabında 10 qol var. 34 yaşlı müdafiəçi debüt etdiyi “Turan” və indi şərəfini qoruduğu “Sumqayıt”dan başqa “Qəbələ”də də çıxış edib.
Maraq üçün qeyd edək ki, Azərbaycan Premyer Liqasında ən çox oyun keçirən futbolçu Rahid Əmirquliyevdir. “Səbail”in yarımmüdafiəçisi 449 matçda meydana çıxıb.
