Bu ölkə klubları VAR-ın əleyhinə səs verdilər

Norveç futbol çempionatının elit və birinci divizion klubları Video Köməkçi Hakim (VAR) sistemindən istifadəni dayandırmağa səs veriblər.

Aut.az xəbər verir ki, bu barədə “Norsk Toppfotball” təşkilatı məlumat yayıb.

Səsvermədə 32 komanda iştirak edib. Onlardan 19-u oyunun VAR ilə davam etdirilməsinin əleyhinə, 13 klub isə davam etdirilməsinin leyhinə səs verib.

“Biz texnologiyanın potensiala malik olduğunu başa düşürük, lakin bugünkü müzakirələrdən və sonrakı səsvermədən görə bilərik ki, klublarımızın əksəriyyəti VAR-ın hazırkı versiyasının kifayət qədər yaxşı işləmədiyinə inanır”, – deyə təşkilatın sədri Kato Hauq bildirib.

Klublar həmçinin Norveç Futbol Federasiyasından 2025-ci il mövsümündən etibarən VAR-dan istifadənin dayandırılmasını təsdiqləməyi xahiş ediblər.

Qeyd edək ki, Avropada TOP-30 liqa siyahısında yer alan, amma VAR-dan istifadə etməyən yeganə turnir İsveç çempionatıdır.

Aut.az