Xəbər lenti
Kurban Berdıyevin “Turan Tovuz”a gəlişi bir çox müəmmalı suallar yaratdı.
Çünki belə ranqda – böyük tələbləri olan bir mütəxəssisin klub gətirilməsi planda yox idi.
Klub rəhbərliyi də mətbuata açıqlamalarında dəfələrlə bildirmişdilər ki, əsas hədəf ardıcıl strategiya ilə inkişafdır. Yəni əvvəlcə infrastruktur qurulur, uşaq futbolu inkişaf edir və bunların fonunda da əsas komanda tədricən uğura doğru yol alır.
Amma gözlənilmədən bu plandan imtina edildi. Təbii ki, hər kəsə aydındır: “Turan Tovuz”un imkanı, infrastrukturu Kurban Berdıyevin tələbləri ilə tərs mütənasibdir.
Elə isə Berdıyev Tovuzda necə peyda olub?
Bununla bağlı Aut.az səhih məlumat əldə edib. Kluba yaxın mənbənin saytımıza verdiyi məlumata görə, Berdıyevi Tovuza azərbaycanlı milyarder, Rusiya Prezidenti Putinin yaxın dostu İlham Rəhimov gətirib. İlham Rəhimovla Kurban Berdıyevin yaxşı münasibətlərinin olduğu deyilir. Berdıyev vaxtilə “Rubin”dən qalmaqalla ayrılandan sonra onun yenidən Tatarıstan klubuna qayıtmasına məhz İlham Rəhimov lobbiçilik edib. Əvəzində isə həmin vaxt bir azərbaycanlı futbolçu “Rubin”ə gedib. Berdıyev Araz Abdullayevi istəsə də, o, bunda maraqlı olmayıb. Nəticədə Ruslan Abışov “Rubin”də peyda olub.
Berdıyevin “Turan Tovuz”a gəlişi klub rəhbərliyinin iradəsinin əksinə baş verib. Yəni onlar İlham Rəhimovun tələbinə qarşı çıxa bilməyiblər. Bildirilir ki, Berdıyevə ödəniləcək vəsaitin bir qismini də məhz tovuzlu milyarder özü qarşılayacaq.
Amma türkmən mütəxəssisin Tovuzda çox qalacağı inandırıcı deyil. Tovuzda şəraitlə tanış olan məşqçi bərk qəzəblənib, belə şəraitdə işləyə bilməyəcəyini deyib.
Aut.az
