Efirdə qadınları təhqir edən şərhçi cəzalandırıldı

Şərhçi Vladimir İvanitski BRİKS Oyunlarında işləməkdən uzaqlaşdırılıb.

Aut.az xəbər verir ki, bu barədə “Matç” telekanalının baş prodüseri Aleksandr Taşçin məlumat verib.

Çərşənbə günü BRİKS Oyunlarında sambo yarışı zamanı rusiyalı Kirill Knyazkov güləşərkən, İvanitski idmançını təqdim edərkən onu “kürəkən” adlandırıb və qadınları ona diqqət yetirməyə çağırıb. Amma eyni zamanda qeyd edib ki, bizə yüngül əxlaqlı qadınlar lazım deyil.

“Telegram kanallarında BRİKS Oyunlarında sambo yarışından videonun fraqmenti yayılıb. Həmin videoda şərhçi Vladimir İvanitskinin kobud və yanlış açıqlaması var. Vladimir holdinqimizin tam ştatlı işçisi deyil və döyüş sənəti yarışlarında iştirak edir.

Təəssüf ki, böyük təcrübəsinə baxmayaraq, Vladimir BRİKS Oyunlarında – federal idman kanalı olaraq böyük miqdarda maliyyə, texniki və yaradıcı resurslara sərmayə qoyduğumuz bir yarışmada öz işinin bir hissəsi olaraq fikirlərini ifadə etmək üçün qeyri-münasib üsula yol verdi. Vladimirin BRİKS Oyunlarında gələcək işlərdən uzaqlaşdırılması barədə qərar qəbul edilib.

Öz adımdan efirdə belə ifadələr eşitməyə məcbur olan hər kəsdən üzr istəyirəm”, – Taşçin teleqram kanalında yazıb.

Şərhçi özü ittihamlarla razılaşmır və heç bir nalayiq ifadə işlətmədiyini bildirib.

Aut.az