Qadın hüquqlarını müdafiə edən britaniyalı fəal Aleşa De Freitas Formula 1 komandası “Red Bull”da baş verən qalmaqallı vəziyyətdən hiddətlənib.
Aut.az xəbər verir ki, daha əvvəl “Red Bull”un rəhbəri Kristian Hornerə qarşı daxili audit aparılmışdı. O, qadın işçilərdən birinə qarşı nalayiq davranışda ittiham olunub. Sonradan ona bəraət verilib.
“Sadəcə qadınların şikayətlərinin lazımi qaydada araşdırılacağına inamları yoxdur. Ona görə də düşünmək lazımdır ki, bu işdə belə olubmu? Bu qadının başına gələnlər fikir söyləməyin böyük bir risk olduğu fikrini gücləndirir. Bu vəziyyətin ən narahatedici tərəfi araşdırmanın firma adından aparılması, lakin nəticələrin tam şəkildə ictimaiyyətə açıqlanmamasıdır. Prosesin lazımi qaydada aparıldığına necə əmin ola bilərsiniz? Formula 1-in yüksək rütbələrində toxunulmaz hesab edilən çox güclü insanlar var və bu, potensial olaraq təcavüzün geniş yayıla biləcəyi bir mühit yarada bilər. Mən bu qadına həqiqətən rəğbət bəsləyirəm”, – De Freitas deyib.
Aut.az