İspaniyalı qadın futbolçular milli komandaya gəlməkdən imtina edirlər.
Aut.az xəbər verir ki, Luis Rubiales və Cennifer Hermoso arasındakı öpüş hekayəsindən sonra etiraz əlaməti olaraq İspaniya yığmasında oynamamaq qərarına gələn 23 dünya çempionu və qalan futbolçular komandaya qayıtmaq fikrində deyillər. Futbolçuları nə Rubialesin istefası, nə də baş məşqçi Xorxe Vildanın getməsi razı salmayıb. Onlar ölkənin futbol federasiyasında islahatların aparılmasını tələb edirlər.
Buna baxmayaraq, komandanın yeni baş məşqçisi Montserrat Tome boykot elan edən futbolçuları milliyə çağırıb. Buna rəğmən futbolçular bir daha milli komandaya gəlmək istəmədiklərini bəyanat şəklində elan ediblər.
“Qadınlardan ibarət futbol komandasının oyunçuları aşağıdakıları bildirmək istəyirlər:
Bizim son bəyanatımızda açıq-aydın qeyd olunanlar, başqa şərh imkanı olmadan qüvvədə qalır. Qəti niyyətimiz odur ki, milliyə çağırılmayaq.
Peşəkar oyunçular olaraq, federasiya bizi siyahıya daxil etdikdən sonra məruz qala biləcəyimiz mümkün hüquqi nəticələri araşdıracağıq. Baxmayaraq ki, artıq ictimaiyyətə açıqlanmış və tam təfərrüatlı səbəblərə görə çağırılmamağı xahiş etmişdik. Buna əsaslanaraq gələcəyimizlə bağlı ən yaxşı qərarı verəcəyik.
Bu mənada, FİFA-nın Oyunçuların statusu və transferləri haqqında Əsasnaməsinə I Əlavənin 3.2-ci bəndinə uyğun olaraq çağırışın vaxtında edilmədiyini qeyd etməyimiz məqsədəuyğun görünür, ona görə də anladığımız kimi, federasiya bizdən milliyə gəlməyi tələb edəcək vəziyyətdə deyil.
Bir daha təəssüflənirik ki, federasiyamız bizi heç vaxt istəməyəcəyimiz vəziyyətə salır”.
Xatırladaq ki, İspaniya Kral Futbol Federasiyasının prezidenti olan Luis Rubiales DÇ-2023-də qalib gəldikdən sonra İspaniya millisinin futbolçusu Cennifer Hermosonu öpmüşdü. O, tənqidlərlə üzləşdikdən sonra istefa vermək məcburiyyətində qalıb.
