Azər Bağırov: “Rəhbərlik hansı mükafatı versə, onunla kifayətlənəcəyik”

Azərbaycan Premyer Liqasının VI turunun “Araz-Naxçıvan” – “Neftçi” oyunundan (1:0) sonra meydan sahibi komandanın baş məşqçisi Azər Bağırov jurnalistlərin suallarını cavablandırıb.

Aut.az xəbər verir ki, mütəxəssis əvvəlcə görüşlə bağlı fikirlərini bildirib…

– “Neftçi” adlı-sanlı klublarımızdandır. Onlara qarşı oynamaq çətindir. Yaxşı oyunçuları var. Bunları əvvəldən uşaqlara demişdik, necə oynayacağımızı bilirdik. Bəzi boşluqlar oldu, bu da həyəcandan irəli gəlirdi. Şükürlər olsun, qələbə bizim tərəfdə oldu. Sona qədər yaxşı mübarizə apardıq. Bu, mənim üçün vacib idi.

– Rəqib baş məşqçi bildirdi ki, 10 nəfərlə müdafiə olunan komandaya qarşı oynamaq çətindir. Bu fikirlə nə qədər razısız?
– Fikrinə hörmətlə yanaşıram, epizodik olaraq arxada qalırdıq. Açıq futbolu xoşlayıram, 10 nəfərlə qalanda da pressinq edir, rəqibi sıxmağa çalışırdıq. Hər zaman rəqibin meydançasında oynamaq istəyirəm.

– Abdulla Rzayev nə üçün heyətdə yox idi?
– Cüzi zədəsi var. Ehtiyat etdik. İstirahət verdik ki, bərpa olunsun. 2-3 günlük yüngül zədəsi var. Risklərimiz çox olacaq. Heç nədən qorxmuruq. Futbolçu bütün mövqelərdə oynamağı bacarmalıdır. Elə ola bilər ki, mərkəz müdafiəçilərimiz irəlidə oynasın. Hər kəs hər şeyə hazır olmalıdır. Bütün mövqelərdə oynamağı bacarmalıyıq.

– Qələbəyə görə mükafat olacaq?
– Rəhbərlik verəndə biləcəyik. Oyuna xüsusi hazırlığımız yox idi. Rəhbərlik hansı mükafatı versə, onla kifayətlənəcəyik.

– Neçənci pillədə olmaq sizi qane edəcək?
– Hansısa mövqe düşünmürəm. Bu günlə yaşayıb, sabaha baxıram. Hansı pillədə olacağımızı sonda biləcəyik. Maksimumu etməyə çalışırıq.

– Azərbaycanın ən köklü klubuna qalib gəldiz. Nə hiss edirsiz?
– Ciddi nəsə yoxdur. Qolda da çox sevinmədim. Mənim üçün vacib olan nəticədir. Hər oyun özümə dərs verirəm ki, nələrisə daha yaxşı etmək olar. “Neftçi”ni udduq və ya “Qarabağ”a uduzduq fərq etməz. Bu gün kimisə məğlub etmək mənə şöhrət gətirmir. Vacib olan komandamın qələbəsidir.

– Vadim Abdullayevin durumu necədir?
– Yaxşıdır. Uzun illər idi böyük futbolda yox idi. Onu yavaş-yavaş geri qaytarırıq. Böyük zədəsi yoxdur.