“Sabah”ın qolkiperi Nicat Mehbalıyevin komandadan ayrılmaq istəməsi ilə bağlı məlumat vermişdik. 22 yaşlı qapıçı artıq 3 klubun maraq dairəsinə düşüb.
Aut.az-ın əldə etdiyi məlumata görə, U-21 millimizin sabiq üzvü ilə “Qəbələ”, “Sumqayıt” və “Neftçi” maraqlanır. Bu mövsüm bütün turnirlərdə cəmi 2 oyun çıxan Mehbalıyev daha çox oynayacağı komandaya keçmək istəyir.
Buna görə o, “qırmızı-qaralar” və “kimyaçılar” arasında seçim edəcək. Nicat “Neftçi”yə keçməyə isti yanaşmır. Çünki ehtiyat qapıçı olmaqda maraqlı deyil.
Mehbalıyev 2021/22 mövsümündə icarə əsasında çıxış etdiyi “Qəbələ”yə dönməyi daha çox arzulayır. Əyalət təmsilçisi də onun transferində maraqlıdır.
Ancaq onun transferi ilə bağlı məsələdə bir düyün var. Qolkiperin “Sabah”la müqaviləsinin müddəti 2024-cü ilin yayına qədərdir. Nicat Mehbalıyevi transfer etmək istəyən klub “bayquşlar”ın razılığın almalıdır.
Aut.az
