Xizək yarışlarının əfsanəsi hesab edilən Tereza Yohauq 2022-ci ildə Pekində keçirilən Qış Olimpiya Oyunlarından sonra idman tərk etdi. 4 qat olimpiya, 14 qat dünya çempionu və dünya kubokunun 3 qat qalibi olması onun necə idmançı olmasının əyani sübutudur.
2016-cı ildə yaşadığı dopinq qalmaqalı norveçli xanım idmançının uğurlarına kölgə salmadı. Ancaq onun gedişi həmkarlarının yolunu açdı. Aşkar favoritin getməsi başqalarına da qalib gəlmək şansı yaratdı.
İdmandan kənar qalmaq isə Yohauqun özünə heç də pis təsir etmədi. Əksinə, yeni həyata başladı. Bu ilin iyulunda ana olacağını açıqladı:
“Övlad, əldə edə biləcəyiniz ən vacib şeydir. Bu, qazandığım bütün qızıl medallardan üstündür. Xoş hisslərdir. Amma etiraf etməliyəm ki, mənə bir az qorxulu gəlir. Hansı yükün altına girdiyini tam başa düşmürsən. Amma mən bunu səbirsizliklə gözləyirəm”, – deyə 34 yaşlı idmançı bildirib.
Həyatı boyu mümkün qədər aktiv olan Yohauq məşqlərdən qalmaq fikrində deyil. Tereza Norveç idmanının başqa bir əfsanəsi Marit Byorgen ilə məsləhətləşdikdən sonra hamiləlik dövründə idmanla məşğul olmağa davam etmək qərarına gəldi. O düşünür ki, bu, ona heç bir problem yaratmayacaq.
Norveçli xanım təkcə idman etməklə kifayətlənmir. O, ətrafdakı bütün hamilə qadınları ilhamlandırmaq və aktiv həyata cəlb etmək üçün “Johaug Recharge” icmasını yaradıb. Bu cəmiyyət xanımların idman etdikləri, ünsiyyət qurduqları və yaxşı vaxt keçirdikləri düşərgəyə bənzəyir.
İdman zalında Yohauq ştanqı qaldırmaqdan qorxmur. Övladı dünyaya gəldikdən sonra belə dayanmaq fikrində deyil.
Ancaq pərəstişkarlarının Tereza ilə bağlı planları var. İnanırlar ki, təcrübəli idmançı 2025-ci ildə ölkələrində keçiriləcək Dünya Çempionatında iştirak etmək üçün idmana qayıdacaq. Hamiləlik zamanı etdiyi çılğın məşqlər insanları belə düşünməyə və onun qayıdışına inanmağa vadar edir. Üstəlik, o, gələcəyi haqqında olduqca sirli danışır:
“Hamı bu barədə məndən soruşur, amma cavabım yoxdur. Heç bir qapı bağlı deyil, açıq da deyil. Hazırda təqaüdçü həyatı yaşayıram. 2023-cü ildə nə ilə qarşılaşacağımı səbirsizliklə gözləyirəm. Vaxtı gələndə başqa bir şey edəcəyəm. Geri qayıtmaq üçün mənə nə lazımdır? Bu barədə çox düşünməmişəm. Gələcəkdə nə olacağını bilmirik. İdmanı, yaşadığım həyatı və əldə etdiyim nailiyyətləri sevirəm. Tronheymdəki çıxış, bəlkə də qapını bir az açan yeganə şeydir, amma hələlik işim bitib”. (Publika.az)
