Xəbər lenti
Premyer Liqada yerini qorumağı bacaran “Kəpəz” artıq yeni mövsümün hazırlıqlarına başlayıb. Gəncə təmsilçisi hazırda 3 istiqamətdə fəaliyyətdədir. Onlardan biri baş məşqçi məsələsidir.
Aut.az-ın əldə etdiyi məlumata görə, “Kəpəz” rəhbərliyi baş məşqçi Tərlan Əhmədovun mövsümün sonunda bitən müqaviləsini yeniləməyi planladırsa da, bunu reallaşdırmaq mümkün olmayıb.
Çalışdırıcı ilə sözləşmənin maddi tərəfi və müddətində razılığa gəlinib. Ancaq Əhmədovun irəli sürdüyü şərtlər razılığın rəsmiləşməsinə imkan vermir.
51 yaşlı mütəxəssis klubun idarə heyətinin sədri İlqar Nadiridən komandaya, transferlərə nəzarətin tam olaraq ona verilməsini istəyib. O, eyni zamanda klubda çalışan bəzi şəxslərin qovulmasını da tələb edib. Əhmədovun “qara siyahı”sındakı birinci şəxs isə Mehman Allahverdiyevdir. Baş məşqçi 63 yaşlı idman direktoru ilə bir yerdə işləmək istəmir.
İlqar Nadiri Tərlan Əhmədovun şərtlərilə razılaşmayıb və ona fikirləşmək üçün vaxt verib.
Bizə məlum olan odur ki, baş məşqçi qərarında qətidir, geri addım atmaq fikri yoxdur. Tərəflər razılığa gələ bilməsələr, “Kəpəz” yeni baş məşqçi axtarışlarına başlayacaq.
