Tyerri Anri futbolu daha baxımlı etmək üçün 5 təkliflə çıxış edib.
“Arsenal”ın sabiq forvardı “CBS Sports”da verdiyi açıqlamada bu haqda danışıb.
Onun bir təklifi odur ki, matçlar zamanı hakimlərə mikrofondan istifadəyə icazə verilsin.
“Hakimlər oyundan sonra mətbuata danışmalıdırlar. Üstəlik, onların mikrofonları da olmalıdır. Mən onların nə dediklərini eşitmək istəyirəm. Çünki bəzən onlar mən olduğum kimi nəzakətli olmurlar. Buyurun, zəhmət olmasa səhvlərinizi və ya nə qədər dahi olduğunuzu izah edin. İnsanların futbolçulara dediyi kimi, biz də onların nə qədər yaxşı və ya pis olduğunu deyə bilməliyik”, – Anri deyib.
Anrinin ikinci təklifi vaxtı yubadan komandaların cəzalandırılmasıdır. “Kimsə oynamaqdan imtina edirsə, vaxtı uzadırsa, fitdən sonra topu harasa vurursa ondan qapıdan 25 metr məsafədə zərimə zərbəsi təyin edilməlidir. Və bunun üçün istənilən nöqtəni seçmək imkanı olmalıdır”, – Anri vurğulayıb.
Üçüncü təklif odur ki, nəticədən asılı olmayaraq matçda ən azı üç qol vuran komandaya əlavə bir xal verilsin. Dördüncü təklif, həkimlərin zədəli futbolçunu müalicə etdiyi bir vaxtda müvəqqəti əvəzləməyə icazə verilməsidir ki, komanda on kişi ilə oynamasın.
Beşinci ideya klubların idman direktorlarını, komandaya gələcəkdə qoşulacaq futbolçularla görüşmək üçün səfərə çıxmağa məcbur etməkdir. “Evi görmədən ev almaq olmaz. Mən bir çox oyunçu gördüm ki, kimsə onun adaptasiya olub-olmayacağı barədə heç bir fikrə sahib deyildi”, – Anri bildirib.
Aut.az
