Azərbaycan Premyer Liqasının XXXIII turunun “Turan Tovuz” – “Neftçi” oyunundan (4:0) sonra qonaq komandanın baş məşqçisi Laurentsiu Regekampf jurnalistlərin suallarını cavablandırıb.
Aut.az xəbər verir ki, mütəxəssis əvvəlcə görüşlə bağlı fikirlərini bildirib…
– Gözəl qələbə idi. Azarkeşlərimizə təşəkkür edirəm. Komandanın dar günündə yanında oldular. Bizim üçün vacib qələbə idi. Əlbəttə, “Neftçi”yə qalib gəlmək xoşdur. Yolumuza davam edirik. Evdə qələbə qazanmağımız önəmli idi. Uzun müddət idi burada üç xal qazanmırdıq. Futbolçularımı təbrik edirəm. Oyunlar fərqli olur, rəqibdən də çox şey asılıdır. Bu gün həm oyun, həm də nəticə bizi qane etdi.
– Kubokda “Neftçi”yə son dəqiqələrdə uduzmuşduz. Bugünkü qələbə həmin görüşdən yaranan emosiyaların təsiri idi?
– İki oyunu müqayisə etmək istəmirəm. “Neftçi” kubokdakı kimi oynamadı, bu, reallıqdır. Bəlkə də, biz kubokda finala yüksəlsəydik, nəticə fərqli olardı. Futbolçularda “Neftçi”ni məğlub etmək istəyi çox idi. Bu qələbəyə ehtiyacımız var idi.
– Kubok oyununun son dəqiqələrinə 6 müdafiəçi ilə oynayırdız…
– Həmin oyunda Siyanda zədələnmişdi. Onu çıxarmaq istəyirdim. Rəqib də bizə ancaq kənarlardan hücum edirdi. Bunun qarşını ala bilmişdik. Amma bir cərimə zərbəsi oyunun taleyini dəyişdi. Bu, futbolda olan şeylərdir. “Neftçi” də həmin oyunda Emin Mahmudovun sayəsində qələbə qazandı.
– “Neftçi”yə qarşı belə qələbə sizə ikiqat motivasiya verir?
– “Neftçi”yə qarşı oyunlar həmişə maraqlı keçir. Bugünkü oyun bizi sevindirir. Çempionatın əvvəlindən belə oynamağa çalışmışıq. Vaxt lazımdır, getdikcə futbolçular bir-birini daha yaxşı başa düşürlər. İndi daha rahatdırlar.
– Bu oyun göstərir ki, “Neftçi”ni kubokda keçmək olardı. Nəyisə səhv etdiyinizi qəbul edirsiz?
– Xeyr, qəbul etmirəm. İki oyun fərqlidir. Son dəqiqələrdə stress yaşamışdıq. Rəqib bizi arxada qalmağa məcbur etdi. Kubok oyununda biz də qol vura bilərdik. Oyundan sonra müzakirələr normaldır. Mənə görə, komandamın bir az soyuqqanlı olmağı bizə mane oldu. Ümumilikdə yaxşı mübarizə aparmışdıq. “Neftçi” də həmin oyuna fərqli hazırlaşmışdı. Burada baş tutan ilk oyunda da qol buraxmamağa oynamışdılar.
– Runi Eva mövsümdə 15-ci qolunu vurdu. Onunla bağlı planlarınız nədir?
– Bizim çempionata uyğunlaşmaq çətindir. Runi komandasını tapıb, reallıq var. Səhv etmirəmsə, 5 ya 6-cı turda mənə sual vermişdilər ki, Runini niyə gətirmisiz? Həmin vaxt mənə qəribə gəlmişdi. Əlbəttə, indi ona təkliflər olacaq. İnkişaf istəyiriksə, heyət qorunmalı və rəqabəti artırmalıyıq. Müqaviləsi mövsümün sonuna qədərdir.
– İki qolu standart vəziyyətdən vurduz. Buna xüsusi hazırlaşırsız?
– Biz hər oyunda bunlara çalışırıq. Müllerin gəlişi bu vəziyyətlərdə bir az da üstünlük verib. Bu, bizi sevindirir. Rəqiblər də bizə qarşı daha ehtiyatlı olacaq.
– Kubok oyununun komandada yük yaratdığını düşünürsüz?
– Bizim üçün yük idi. Gələcəyimiz üçün geniş heyət olmalıdır. Bəzi matçlarda bəzi dəyişikliklər çətinlik yaratdı. Kubok oyunundan sonra fikirləşirdik ki, komanda rahatlaşacaq.
– Solomon Kverkeliya ilə mübahisənizin səbəbi nə ilə bağlı idi?
– Oyun ətrafında böyük ajiotaj var idi. Elə bir anda oyunçu gəlib azarkeşlərə “danışmayın, sakit durun” deyirsə, bu, fanatlarda qıcıq yaradır. Mən də bunu dedim ki, belə etməsin. Mən müdaxilə etməsəydim, bəlkə, başqa cür dialoqa girərdi.
