Mövsümün əvvəlində elan olundu ki, Azərbaycan Premyer Liqasında sonuncu yerin sahibi elitanı tərk edəcək və Birinci Diviziondan bir klub yüksək liqaya vəsiqə qazanacaq.
Ancaq son günlər ərzində situasiya dəyişib. “Araz Naxçıvan” elitaya yüksəlmək üçün vəsiqəni təmin edib. Ancaq Naxçıvan təmsilçisinə lisenziya verilməyə bilər.
Aut.az-ın əldə etdiyi məlumata görə, buna səbəb klubun adının danışılmış oyunlarda hallanmasıdır. AFFA hazırda bir neçə şübhəli oyun ətrafında araşdırma aparır ki, onlardan ən azı birinin iştirakçısı “Araz Naxçıvan”dır. Komandanın Divizionun 22-ci turunda “Turan Tovuz-2”-yə 6-5 hesabı ilə qalib gəlməsi futbol ictimaiyyətində şübhələr yaradıb. Nəticədə 11 qolun vurulduğu qarşılaşma federasiyanın şübhəli oyunlar siyahısına daxil olub. Hazırda bu istiqamətdə araşdırma aparılır.
“Araz Naxçıvan”ın danışılmış oyunun iştirakçısı olması təsdiqlənərsə, kluba növbəti mövsüm Premyer Liqada mübarizə aparmaq üçün lisenziya verilməyəcək. Belə olan halda elitada vəziyyət necə olacaq?
Əldə etdiyimiz məlumata görə, divizionda normal infrastruktura sahib başqa bir klub olmadığından, AFFA Premyer Liqanın sonuncusuna şans verə bilər. Ancaq bu, yekun qərar deyil. Aşağı dəstədə çıxış edən hansısa komandanın yüksək liqaya gətirilmə ehtimalı da var. Bu yöndə araşdırmalar davam edir. “Araz Naxçıvan” “sudan” quru çıxsa, vəsiqənin sahibi elə özü olacaq.
Bu məsələ ilə bağlı qərar mövsümün sonunadək – mayın 15-ə kimi veriləcək.
Aut.az
