Əfsanəvi boksçular Mayk Tayson və Evander Holifild sərgi xarakterli döyüş keçirə bilər.
Aut.az xəbər verir ki, bu barədə “YouTube” kanalı TMZ məlumat verib.
Tayson deyib ki, belə bir döyüşün tərəfdarıdır və bunun üçün pul ödəməyə hazır olan insanlar var.
“Mən bunu etmək istərdim, Səudiyyə Ərəbistanı bunu etməyimi istəyir. Bunun üçün pul ödəməyə hazır olan insanları görəndə başım daha yaxşı işləməyə başlayır”, – boksçu deyib.
56 yaşlı Mayk Tayson ağır çəki dərəcəsində çıxış edən amerikalı peşəkar boksçudur, tarixin ən məşhur və tanınan boksçularından biridir. Peşəkar karyerasında 58 döyüş keçirib, 50 qələbə (44 nokautla) qazanıb və 6 dəfə məğlub olub.
Evander Holifild ağır çəki dərəcəsində yarışan və Beynəlxalq Boks Şöhrət Zalının üzvü olan amerikalı peşəkar boksçudur. O, peşəkar boks tarixində ağır çəkidə yeganə dördqat dünya çempionudur, həm də iki çəki dərəcəsində mütləq dünya çempionu titulunu qazanmağı bacarıb. 60 yaşlı Holifildin 44 qələbəsi, on məğlubiyyəti və iki heç-heçəsi var.
Tayson və Holifild əvvəllər iki dəfə qarşılaşıblar. İlk döyüş Holifildin qələbəsi ilə başa çatdı, ikincidə Tayson rəqibinin qulağının bir hissəsini dişləyib. Döyüş dayandırılıb, Tayson diskvalifikasiya və üç milyon dollar cərimə edilib.
Aut.az