Futbolda çox az oyunçu şansını gözləməyi xoşlayır. İdmanın şahında bəxt üzünüzə gec də gülə bilər, tez də. Həmin anı səbirlə gözləmək hər insanın işi deyil. Argentinalı Emiliano Martines belə idmançılardan biridir.
Karyerası boyu problemlər, şansızlıqlar onun da nəsibi olub.. Həyatındakı ən çətin qərarı isə 2010-cu ildə ailəsində çox uzağa – Londona gedərkən verib. “İndependiente”dən “Arsenal”ın gənclər komandasına transfer olmaq həyatını dəyişdirən qərar idi:
“Qardaşım və anam “nə olar, getmə” deyərək arxamca ağlayırdılar. Amma atamın da, xərclərimizi qarşılaya bilmədiyi üçün gecələr gizlicə göz yaşı tökdüyünü görmüşdüm. Ona görə də ailəm üçün cəsarətli olmalıydım” – deyə Emiliano həmin günləri xatırlayır.
Hər şey dördüncü liqadan başladı
Martinesin peşəkar karyerasındakı debütü 2012-ci ildə “Arsenal”da deyil, İngiltərənin dördüncü liqasında – icarə əsasında yollandığı “Oksford Siti”də baş tutdu. Argentinalı qolkiper növbəti mövsümü Çempionşip təmsilçisi “Şeffild Uensdey”də keçirdi. Bir il sonra “topçular”ın düşərgəsinə qayıdan Emiliano bu komandadakı debütü reallaşdıra bildi.
“Mançester Yunayted”lə oyunun 59-cu dəqiqəsində zədələnən Voyçex Şensninin əvəzinə meydana daxil olan Martines, həmkarının yoxluğunda sonrakı 3 oyunda qapını qorudu. Ancaq “Arsenal”ın o vaxtkı baş məşqçisi Arsen Venger qış transfer pəncərəsində gənc qapıçını “Rotherhem”ə icarəyə göndərilməsinə qərar verdi. Beləcə, onun başqa klubların düşərgəsinə göndərilmə prosesi daha bir neçə il davam etdi. Bu müddətdə argentinalı “Vulverhempton”, “Xetafe”, “Ridinq” kimi klublarda çıxış etdi.
Əsas qapıçı olmaq üçün daha nə edəsən?
Qolkiperin bəxti üzünə bir daha 2020-ci ildə güldü. Bernd Leno zədələndikdən sonra argentinalı “Arsenal”ın əsas qapıçısına çevrildi. 27 yaşlı “Dibu” ələ düşən fürsəti boşa vermədi. İngiltərə Kubokunun finalında – “Çelsi”ylə matçda komandasının titula sahib çıxmasında müstəsna rol oynadı. Emilliano şans qazandığı oyunlarda özünü yaxşı tərəfdən göstərə bilsə də, məşqçilər korpusu ona yenə əsas qapıçı kimi şans vermək istəmirdi. Bu vəziyyət onu heç cür qane etmirdi. Nəticədə o, “Arsenal”ı “Aston Villa”ya birdəfəlik dəyişmək qərarına gəldi. Maraqlı məqam odur ki, London klubu şans vermədiyi qapıçının transferindən 8 milyon avro qazanc əldə etdi.
Yeni dönəm, yeni ümidlər
Birmingem Emiliano üçün düşərli oldu. “Aston Villa”dakı ilk mövsümündə 15 oyunda qapısını toxunulmaz saxlayaraq klubun rekordunu təkrarladı. Bunun nəticəsində komandanın əsas üzvlərindən birinə çevrildi. “Villa”dakı uğurlu çıxış onun Argentina millisindəki mövqeyinə də təsirini göstərdi. Martínes 2011-ci ildən bir neçə dəfə Argentina milli komandasının düşərgəsinə çağırılsa da, lakin debüt etmək imkanı qazanmamışdı.
Ancaq “Aston Villa”dakı performansı ona bu imkanı yaratdı. 2021-ci ilin iyununda o, ilk dəfə Çiliyə qarşı matçda milli formanı geyindi. Qısa zaman kəsiyində yığmadakı ilk titulunu qazandı. 10 illik fasilədən sonra Kopa Amerikanın qalibi olan “albiseleste”nin bu uğurunda əsas pay sahiblərindən biri elə Martines idi. O, xüsusilə Kolumbiya ilə yarımfinal matçında penatilər seriyasına öz damğasını vurdu. “Dibu”nın uğurlu çıxışı mükafatsız qalmadı. Nəticədə turnirin ən yaxşı qapıçısı seçildi.
Çempionluğa gedən yolda dəf edilən penaltilər
Qəhramanımızla bağlı əsas hadisə bu il yaşandı. Bir vaxtlar milli komandanın azarkeşi kimi mundiallara qatılan Emiliano bu dəfə hadisələrin mərkəzində idi. Futbolda belə deyim var: “yaxşı qapıçı komandanın yarısıdır”. Bu ifadə 30 yaşlı qolkiperə də aiddir. O, az qala bütün oyunlarda uğurlu çıxış etməklə formasının haqqını artıqlamasıyla verdi. Niderlandla 1/4 final matçında penaltilər seriyasındakı performansı komandasını yarımfinala, ardınca finala daşıdı.
“Qızıl ilahə” uğrunda görüşdə yenə iş başında idi. Xüsusilə “over time”ın son saniyələrində etdiyi seyv matçın penaltilər seriyasına uzanmasına səbəb oldu. Burada da inamlı çıxış edən Martines bütün argentinalıların çempionluq arzusunun reallamasında əsas pay sahiblərindən biri oldu. Mundial boyu sərgilədiyi inamlı oyun “Dibu”nu DÇ-2022-nin ən yaxşı qapıçısı nominasiyasının sahibi etdi.
İndi o, KİV-in gündəminə çevrilən futbolçulardan biridir. Performansı, yaşadıqları və gələcək karyerası hər kəs tərəfindən müzakirə edilir. Yazılara inansaq, artıq adı böyük klubların transfer siyahısında yer alıb. 30 yaşında “kül”dən yenidən alovlanan Emiliano Martines üçün hər şey hələ indi başlayır. Onun uğur hekayəsinin necə davam edəcəyini isə zaman göstərəcək. (Publika.az)
