“Vüqar Həşimov Memorialı” kimi böyük turnirdə iştirak edəcəyim üçün sevincli və həyəcanlıyam. Bu yarış dünyanın ən güclü qapalı turnirlərindən biridir”.
Aut.az xəbər verir ki, bu sözləri Publika.az saytına açıqlamasında “Vüqar Həşimov Memorialı-2022” turnirin ən gənc iştirakçısı Aydın Süleymanlı deyib. 17 yaşlı qrossmeyster belə nüfuzlu yarışda iştirak etməyin onun üçün faydalı olacağını söyləyir:
“Burada oynamaq nəticədən asılı olmayaraq mənə çox şey qazandıracaq, daha yaxşı olmağa sövq edəcək. Rəqiblərim dünyanın ən güclü şahmatçılarıdır. Onlarla oynamaq üçün çox səbrsizlənirəm. Aralarında oyunların baxıb öyrəndiyim şəxslər var. Onlarla mübarizə aparmaq çox maraqlı olacaq. Ümid edirəm ki, nəticə yaxşı olar və istədiyim kimi çıxış edə bilərəm”.
Yeniyetmələr arasında dünya və 2 qat Avropa çempionu olan Süleymanlı bu turnirə xüsusi hazırlaşıb. Çünki yarış Azərbaycan şahmatının əfsanələrindən birinin adını daşıyır. Həyəcanlı olduğunu gizlətməyən Aydını təəssüfləndirən məqam isə Vüqar Həşimovla eyni dövrdə çıxış edə bilməməsidir:
“Təbii ki, az-çox həyəcan var. Turnirin Vüqar Həşimovun adına olması məni daha çox həyəcanlandırır və məsuliyyətli edir. Əfsuslar olsun ki, yaşıma görə Vüqar Həşimovu daha yaxından tanımamışam və onunla oynamamışam. Lakin onun çıxışlarına baxdıqda necə böyük şahmatçı olduğunun fərqinə varmaq olur. Vüqar Həşimovla bir yerdə oynayan və onu yaxından tanıyan şahmatçılara məlumat toplamaq üçün bəzi suallar vermişəm. Hamısı təkcə şahmatçı kimi yox, insan kimi də yaxşı biri olduğunu deyiblər”.
Qeyd edək ki, “Vüqar Həşimov Memorialı-2022” 17 – 24 dekabrda “Fairmont Baku” hotelində baş tutacaq. Turnirdə 10 şahmatçı mübarizə aparacaq.
