Xəbər lenti
Qətərdə keçirilən Dünya çempionatı başa çatmaq üzrədir. Cəmi 2 oyun sonra sayca 23-cü mundiala yekun vurulacaq. Turnirin təşkilatçılğı baxımından xoş sözlər söyləmək olar. 300 milyard dollarlıq yatırım edən Qətər FİFA və yüksək məvacib verdiyi mütəxəssislərin böyük dəstəyi hesabına xoş görüntü yarada bildi.
Mundial başlamazdan əvvəl bu ölkəylə bağlı heç də xoş olmayan xəbərlər yayılırdı. Bildirilirdi ki, çempionata hazırlıq mərhələsində çalışan işçilərin hüquqları, ümumiyyətlə qorunmayıb. Stadionların və digər obyektlərin inşasında ancaq miqrantlar çalışıblar. Onların təhlükəsizliyi təmin edilməyindən, çox sayda ölüm faktı da qeydə alınıb. Bununla bağlı müxtəlif ölkələr və qurumlar Qətər hökumətinə etirazlarını bildirsə də, nəticə əldə etmək mümkün olmayıb.
DÇ-2022 zamanı isə hər şey mükəmməl görüntü effekti verib. Böyük vəsait xərclənən turnirdə hansısa ciddi problemin yaşanacağını gözləmək sadəlövlük olar. Ancaq mundialın görünməyən və qətərlilər tərəfindən mümkün qədər gizlədilən tərəfləri də var. Məsələn, miqrantlar üçün nəzərdə tutulan fan-zonalar. Onlar DÇ-2022-nin keçirildiyi arenalardan mümkün qədər uzaqda salınıb. Buradakı şərait rəsmi fan-zonalardakı qədər komfortlu deyil.
Fransa – Mərakeş qarşılaşmasını paytaxt Dohadan 15 km aralıda yerləşən belə fan-zonalardan birində çox sayda miqrant izləyib. Kriket üçün nəzərdə tutulmuş stadionun içərəsində qurulan bu məkana giriş pulsuzdur. Lusailin cənub sahillərindəki digər fan-zonaya isə giriş 24 manatdır. Burada rahat oturacaqların əvəzinə qazon və asfalt var. Rəsmi fan-zonalardan fərqli olaraq burada spirtli içkilər satılmır. Ancaq bir neçə “fast fud” satılan məntəqə var. Bura gəlmək də elə asan deyil. Yaxınlıqda kasıb insanların istifadəsi üçün sərfəli olan metro belə yoxdur.
Dörd ildir ticarət mərkəzlərin birində çalışan səudiyyə ərəbistanlı Labid bildirir ki, Fransa – Mərakeş oyununun keçirildiyi Əl-Beytdən xeyli uzaq olsa da, bu həyəcanı insanlarla birlikdə yaşamaq onları xoşbəxt edir. Miqrantlar kütləvi şəkildə futbola baxmağı maraqlı hesab edirlər. Turnirin son mərhələlərində xüsusilə Mərakeş millisinə azarkeşlik ediblər.
“Kimin qalib gəldiyi məni maraqlandırmır. Mərakeş artıq dünya çempionudur. Dostum, ekrana bax. Orada Almaniya, İspaniya, Braziliya və ya Kriştiano Ronaldonu görürsən? Xeyr, Mərakeşdir. Köhnə çempionlar getdi. Yeni çempion Mərakeşdir” – deyə Labid bildirib.
Pakistanlı Saqib isə bir neçə yerdə işlədiyinə görə fan-zonaya gəlməyə çətinliklə vaxt tapdığını söyləyir:
“Qətərdə bir işdən digərinə gedirəm. Ona görə də hər axşam vaxtım olmur. Ancaq mümkün olduğu qədər həmişə bura gəlirəm. Dörd nəfərlik mənzilimizdə televizor var, lakin fan-zona daha əyləncəlidir. Buradakı atmosfer futbol stadionuna bənzəyir! Oyundan əvvəl də konsert olur. Bunlara görə pul ödəmək lazım deyi. Bu, əladır”.
Onlar turnirin son 2 oyununu – medallar uğrunda görüşləri də buradan izləyəcəklər. Azarkeşlik etdikləri əsas komanda isə 3-cü yer üçün Xorvatiya ilə mübarizə aparacaq Mərakeşdir.
