Qətərdə keçirilən futbol üzrə dünya çempionatı sona yaxınlaşmaq üzrədir. Təqribən 10 gün sonra “Qızıl ilahə”yə sahib çıxacaq komandanın adına aydınlıq gələcək. Fərqli tarixdə keçirilməsinə rəğmən, mundiala maraq olduqca böyükdür. Ümumiyyətlə budəfəki turnirlə bağlı diqqətçəkən məqamlar çoxdur. Əcnəbi mütəxəssislər fərqli bir çempionat izlədiyimizi söyləyirlər. Bəs bizim yerli futbol adamları nə düşünür? DÇ-2022 ilə bağlı hansı maraqlı məqamlar var? Gözləntilər, sürprizlər nələr idi? Getdikcə gərginləşən mübarizədən nə gözləyək?
Suallarımızı idmanın şahının mütəxəssislərinə ünvanladıq. AFFA Məşqçilər Komitəsinin üzvü Şahin Diniyev Almaniya və İspaniya kimi komandaların çempionatla erkən vidalaşacağını gözləmədiyini bildirdi:
“Bu dünya çempionatı mənim üçün sürprizlərlə dolu oldu. Turnir maraqlı, dinamik və sürətli keçir. Belə yarış gözləmirdim. Bunlar oyunların qışda keçirilməsi, futbolçuların pik formada olması və yorğun olmamaları ilə əlaqədardır. Maddi baxımdan da tarixin ən bahalı çempionatdır. Mərakeşin mübarizəni davam etdirməsi nə qədər süprizdirsə, Almaniya və İspaniya kimi nəhəng millilərin DÇ-2022 ilə erkən vidalaşması bir o qədər sensasiyadır. 2 dünya çempionun belə tez evə yollanacağını heç kim gözləmirdi. Bundan sonra sürpriz olmayacaq. Mərakeş də daxil olmaqla hər kəs öz gücü, oyunu ilə bura qədər gəlib. Oyunlar çox gərgin keçəcək, bundan sonra üçün proqnoz vermək çətindir”.
AFFA-nın məşqçi kurslarının maarifləndirmə üzrə direktoru Aslan Kərimov DÇ-2022-ni təkcə izləməklə kifayətlənmir. O, işi ilə əlaqədar olaraq məşqçilərin fəaliyyətinə də xüsusi nəzər yetirir:
“Bu dünya çempionatını çalışdığım sahəmə görə, xüsusilə izləyirdim. Pandemiyadan sonra keçirilən ilk böyük futbol turniridir. Bir sıra yeniliklər var. Həm oyun, həm texniki qaydalar dəyişib. Yeniliklərin çempionata necə təsir göstərəcəyini gözləyirdim. Mən də həm azarkeşlər, həm də həmkarlarım kimi Belçika, Almaniya və İspaniya kimi yığmaların 1/4 finala qədər irəliləyəcəyini güman edirdim. Çünki adları sadalanan ölkələr futbolda öz sözlərini həmişə deyiblər. Mərakeşdən başqa, bütün millilər finalda oynamaq ixtiyarındadılar. Hər bir komandanın güclü və zəif cəhətləri var. Hansı komanda az səhv edəcəksə, o da çempion olacaq. Məşqçilərdən bu mərhələlərdə taktiki dəyişikliklər və süpriz gedişlər gözləyirəm. Çünki belə məqamlarda yeniliklər olmalıdır. Fransanın hücum potensialı yaxşı olduğundan, onları ən azı finalda görürəm. İrəli xətdəki balansa görə, sanki bir addım öndədirlər.
Futbol mütəxəssisi Sənan Qurbanov da dünya çempionatının mövsümün gedişində keçirilməsinin müsbət məqam olduğunu bildirir.
“Dünya Çempionatının qışda keçirilməsinin ən böyük üstünlüyü odur ki, futbolçular formadadırlar. Elə buna görə bəzi komandaların ifasında sürətli, fiziki hazırlıqlı futbol gördük. Oyunlar eyni tempdə, dinamikada, amma taktiki baxımından biraz fərqli keçir. İlk qarşılaşmalarda bəzi millilər ehtiyatlı oyuna üstünlük verirdisə, sonradan bu vəziyyət dəyişdi. Aktiv futbolla birlikdə taktiki savaşların da şahidi olduq. Ən sensasiyalı nəticə Səudiyyə Ərəbistanının Lionel Messili Argentina üzərində qələbəsidir. Həmin oyunda ərəblər üstün oynasalar da, növbəti mərhələyə vəsiqə qazana bilmədilər. Almaniya da gözləntilərin çox aşağısında oynadı. Bu nəticə onlar üçün fiasko hesab edilməlidir. Eyni zamanda, İspaniyanın da “play-off”da mübarizəni dayandırması diqqətçəkən məqam oldu. Hərçənd ki, onun rəqibi Mərakeş heç də zəif komanda deyil. Onların bir çoxu Avropanın top klublarında oynayır. Bundan sonra mübarizə daha da gərginləşəcək. Finala gedən yolda məsafə qısaldıqca, psixoloji gərginlik yaranacaq” (Publika.az).
Heybət Məmmədov
