PSJ-nin və Fransa millisinin futbolçusu Kilian Mbappenin atası Vilfrid Mbappe oğlunun “Monako”dakı karyerasının ilk illəri haqda danışıb.
Aut.az xəbər verir ki, “L’Equipe” nəşrinə danışan ata Mbappe ilk illərin çətin olduğunu bildirib:
“Mən təkəbbürlü görünmək istəmirəm, amma bəzi digər valideynlərə baxaraq, növbəti pis nümunə olmaq istəmədim. Bu, Kilianın şəxsi döyüşü idi, baxmayaraq ki, məni narahat edirdi. O, “Monako”da karyerasının əvvəlində ehtiyat oyunçular skamyasında oturarkən problemlərlə üzləşəndə, bu vəziyyət mənim üçün çətin idi. Bu, Kilianın yolunda ilk maneə idi.
Mbappe hər gün ağlayırdı. Amma ən çətini o idi ki, bunun üçün o qədər də məntiqli izahat yox idi. Mən qarışmaqdan imtina etdim, çünki özümü məşqçinin yerinə qoyurdum. Adətən valideynlərin müdaxiləsi məşqçinin xoşuna gəlmir.
Çətin yol Kilianın daxilindən cinin çıxmasına imkan verdi. Əvvəllər bir qədər təmkinli olan Mabppe, karyerası ərzində heç kimin ona hədiyyə verməyəcəyini anlayaraq, qətiyyətli, çalışqan bir gəncə çevrildi. O, yetkinləşdi və uşaqlığı 16 yaşında başa çatdı”.
Aut.az
