Bundesliqa klublarının prezidentləri yenidən gündəmə gətirilən Avropa Superliqasının bərpası ideyasına münasibət bildiriblər.
Xatırladaq ki, təşkilatın yeni rəhbəri Bernd Reynhart bildirib ki, Superliqa yaxın 3 il ərzində formalaşacaq. Aut.az xəbər verir ki, “Bavariya”nın prezidenti Oliver Kan “Bild” nəşrinə verdiyi açıqlamada məsələyə belə münasibət bildirib:
“Superliqa yaratmaq cəhdi il yarım əvvəl uğursuzluğa düçar oldu. O vaxtdan bəri biz həmişə mövqeyimizi açıq şəkildə ortaya qoymuşuq”.
Dortmund “Borussiya”sının prezidenti Hans-Yoahim Vatske də ideyanı dəstəkləməyib:
“Çempionlar Liqası, xüsusilə 2024-cü ildən bəri tamamilə müstəsna bir turnir formatına malikdir! Bundan əlavə, UEFA kiçik klubların qayğısına qalır, biz onların dəstəyini hiss edirik”.
“Frankfurt”un İdarə Heyətinin üzvü Aksel Hellman da Superliqaya qarşı çıxıb:
“Superliqa konsepsiyasının uğuruna əmin deyiləm. Hesab edirəm ki, belə şeylər UEFA ilə əməkdaşlıq çərçivəsində həll edilməlidir ki, turnir Avropanın ən yaxşı klubları üçün qapalı liqa olduğu təəssüratı yaratmasın”.
Aut.az