Naxçıvan icra başçısı şahmatçının pulunu vermir

Son dövrün iqtisadi problemlərinin ölkə idmanına mənfi təsir etməsi hamıya məlumdu. Vaxtilə idmanın inkişafına böyük vəsaitlər ayrılsa da, iqtisadi çətinliklər üzündən hazırda bir çox idman federasiyalarının maliyyələşməsində ciddi çətinliklər var. Güləş, həndbol, qolf və digər federasiyalardan sonra problemlər Azərbaycan Şahmat Federasiyasında da yaşanır.
 
Aut.az xəbər verir ki, “offsideplus.az” mövzunu araşdırmaq üçün beynəlxalq qrossmeyster, əməkdar məşqçi, FİDE hakimi və məşqçisi Azər Mirzəyevlə söhbətləşib. Mirzəyev Azərbaycan şahmatındakı mövcud durum və ona qarşı olan haqsızlıqlar barədə danışıb:
 
“6 yaşında şahmatla məşğul olmağa başlamışam və bir çox beynəlxalq turnirlərin qalibi, eləcə də 1995 və 2000-ci illərdə Azərbaycan çempionu olmuş, 1998 və2000-ci illərdə Elista və İstanbulda keçirilən Ümumdünya Şahmat Olimpiadalarında iştirak etmişəm. Həmişə ölkəmizdə şahmatın inkişafı üçün əlimdən gələni əsirməməmiş, Azərbaycanı müxtəlif yarışlarda təmsil edib bayrağımızı ucaltmışam”.
 
Naxçıvan sərgüzəştləri
 
Azər Mirzəyev həmçinin məşqçilik edir, gənc şahmatçıların yetişdirilməsi ilə məşğul olur. O, 2015-2017-ci illərdə Azərbaycan Şahmat Federasiyasının təkidi və Naxçıvan Şahmat Federasiyası prezidenti Vüqar Səfərovun (Naxçıvan şəhəri icra başçısı) dəvəti ilə Culfa və Naxçıvanda gənc şahmatçıların hazırlığını yüksəltmək üçün məşqçiliyə başlayır. Mirzəyev qeyd edir ki, məşqçilik etdiyi dönəmdə Naxçıvan Şahmat Federasiyası onun əmək haqqı və mənzillə təminatını həyata keçirir, o da öz növbəsində gənclərlə işləyir və nəticələr əldə edirdi.

Ancaq ötən il oktyabr ayında Naxçıvan Şahmat Federasiyasının prezidenti Vüqar Səfərovun adından Azər Mirzəyevə əvvəlcədən heç bir bildiriş olmadan və səbəb göstərilmədən işdən uzaqlaşdırıldığı deyilir. Mirzəyev təəccübünü gizlədə bilmir:
 
“Orda işlədiyim illərdə çəkdiyim əziyyət yerə vuruldu. Bu azmış kimi, mənim halal zəhmətimin haqqı ödənilməyib və qaldığım evə görə son 6 ayın kirayəsini də ev sahibinə verməyiblər. İnanın, mənə ödənilməli maaş əslində çox kiçikdi. Ancaq mənim üçün vacibdi, çünki bu mənim zəhmət haqqımdı. Mənə verilməyən maaş isə Naxçıvan Şahmat Federasiyasının prezidenti Vüqar Səfərov üçün mikroskopik rəqəmdi, ona görə də, onların mənə olan borcunu söyləməyə belə, utanıram. Amma onlar pulumu vermədiklərinə görə utanmırlar”.
 
Azər Mirzəyev qeyd edir ki, şahmatçının maaşını verməmək Naxçıvan Şahmat Federasiyasının adətinə çevrilib:
 
“İki il öncə böyük nailiyyətlər qazanan beynəlxalq dərəcəli idman ustası, FİDE məşqçisi İlqar Bacaranini də əmək haqqı ödənilmədən işdən uzaqlaşdırmışdı. Görünür, bu metodlar federasiyanın dəsti-xəttidi”.
 
Şahmatçı Naxçıvan Şahmat Federasiyasının səbatsız fəaliyyəti sayəsində ölkə idmanının perspektivli gəncləri itirdiyini deyir:
 
“Muxtar Respublikanın ən güclü məşqçisi, beynəlxalq dərəcəli idman ustası Talıb Babayev şahmatdan uzaqlaşdırılıb və hazırda Türkiyədə dərs deyir. Yəni mən haqsızlıqla üzləşən ilk və sonuncu şahmatçı deyiləm. Bu özbaşınalıq barəsində cənab Vasif Talıbova məktub da göndərmişəm. Ancaq mənə rəsmi cavab verilməyib”.
 
Azərbaycan Şahmat Federasiyasının etinasızlığı
 
İllərini şahmata həsr edən beynəlxalq qrossmeyster Azər Mirzəyev baş verənlərlə bağlı Azərbaycan Şahmat Federasiyasını məlumatlandırdığını söyləyir:
 
“Bakıda problemin həlli üçün heç əlini belə tərpədən olmadı. Dəfələrlə müraciətlərimə baxmayaraq, heç nəyə nail ola bilmədim”.

Mirzəyev ölkədə idmana olan qayğının yüksək səviyyədə olduğunu qeyd edərək, ölkə prezidenti İlham Əliyev və birinci vitse-prezident Mehriban Əliyevanın xidmətlərini, idmançılara göstərilən qayğını qeyd edir:
 
“Mehriban xanım Əliyeva daim hamının qayğısına qalıb. Ancaq bəzi funksionerlər deyəsən, ölkədə aparılan idman siyasətindən xəbərsizdirlər. Mən o şahmatçıyam ki, Heydər Əliyev Fondu və AMAR Beynəlxalq Xeyriyyə Fondunun 2017-ci ildə İraqda müharibədən əziyyət çəkən qaçqın gənclər üçün təşkil olunan turnirində Azərbaycanı təmsil etmişəm və Mehriban xanım AMAR fondunun rəhbəri, baronessa Emma Nikolsonu qəbul edərkən bu barədə danışmışdır”.
 
Beynəlxalq qrossmeyster 16 ildi susduğunu, amma Azərbaycan Şahmat Federasiyası tərəfindən həmişə haqsızlıq və ayrı-seçkiliyə məruz qaldığını və bu münasibətin onu və bir çox şahmatçıları boğaza yığdığını söyləyir.
 
Şahmatçı yarışlara cibindən pul xərcləyərək gedirmiş
 
“2012-ci ildən bəri mən federasiya hesabına bir beynəlxalq turnirdə belə iştirak etməmişəm. Amma şahmatdan uzaq adamlara xaricə ezamiyyətlər ödənilir, mükafatlandırılır,mötəbər tədbirlərə dəvət alırlar.Uzun illərdi ölkəmizi beynəlxalq arenada öz hesabıma təmsil edirəm. Məni dolayı yollarla başa salırlar ki, hər hansı kömək yalnız gənc şahmatçılara ola bilər. Amma heç gənc şahmatçılara da köməklik göstərilmir. Maraqlıdı, gənc ikən nəticələrim olanda mənim haqqımda deyirdilər ki, gəncdi, təcrübəsizdi və s. İndi isə tam əksini deyirlər. Bəhanə axı həmişə tapmaq olar. Belə bir təəssürat yaranır ki, Azərbaycan Şahmat Federasiyasının prezidenti Elman Rüstəmov şahmatla hec maraqlanmır. Lakin mən yenə də ümid edirəm ki, mənim xidmətlərim Azərbaycan Şahmat Federasiyası və Naxçıvan Şahmat Federasiyası tərəfindən nəzərə alınacaq və onlar mənə olan borclarını verəcəklər”.

 

 

 
Tarix: 22 Fevral [12:50]
Oxunub: 89 dəfə
Müəllif: Aut.az

Xorvatiya yığmasına ŞOK! - Komandadan qovuldu

Aut.az

Velosipeddən yıxılıb öldü

Aut.az

Millimizin üzvü Rumıniya klubunda!

Aut.az

Günün oyunları - TV

Aut.az

Günün oyunları - TV

Aut.az

Məşhur döyüşçüyə Rusiya pasportu verildi

Aut.az

Millimizin üzvü İtaliya klubu ilə müqavilə bağladı - FOTOLAR

Aut.az

Elvin Məmmədovun yeni klubu bəlli oldu - Rəsmi

Aut.az

Patrik Vieyra "Nitsa"da

Aut.az

Dünyaca məşhur boksçular döyüşü buraxıb, onları izlədilər

Aut.az